Ол кэмҥэ тиийэн
Улуу Өлүөнэ өрүспүт
Устар долгунунуу суккуллар
Умнуллубат оҥкуллаах олоҥхобут
Уурумньу тыл кэриэтэ
Ордук биһирэниэ…
С.А.Зверев-Кыыл Уола.
Бэс ыйын 25 күнүгэр саргылаах саха норуотун дорҕоонноох добун тойуксута, кырыымпалыы кылыһахтаах ырыаһыта, үлүскэннээх үтүө үҥкүүһүтэ, суруйааччылар сойуустарыгар киирбит бастакы сахалартан биирдэстэрэ С.А.Зверев-Кыыл Уола төрүөбүтэ 125 сылыгар Кыыл Уола аман алгыһын амалыйбыт, туойан дьэрэлиппит, түһүлгэ төрүттээбит төрүт дойдутугар Түбэй Дьаархан сиригэр «Сунтаар миигин ыҥырар» тохсус ырыа-хоһоон түһүлгэтигэр ыытыллыбыт «Тыл сүмэтэ» түһүмэххэ айар тылы баһылаабыт уонна айар-суруйар эйгэҕэ саҥа холонон, сыстан эрэр саха тылын сүмэтин эттэригэр-хааннарыгар иҥэриммит айар куттаах дьоммут салгын куйаарыттан кэлэр санааларын, иэйиилэрин үллэстэн, айымньыларын ааҕан сэргэхсийэн, саҥа айар кут иэйиитигэр ылларан тарҕастылар. Көҥүл ааҕыы түһүлгэтигэр С.А.Зверев-Кыыл Уолун төрөппүт уола Төгүл Сергеевич, суруйааччы, публицист, тылбаасчыт Валентина Григорьевна Дьячковская-Хара Көмүс, суруйааччы Мария Матвеевна Данилова-Күн Мичээрэ, Чурапчыттан биир дойдулаахпыт Федорова Варвара Ивановна, Кириэс Халдьаайыттан биир дойдулаахпыт суруйааччы Ирина Харайданова- Сэгэлдьийэ Чээлэй, «Ньургуһун» айар-суруйар тыллаахтар түмсүүлэрин бастакы чилиэнэ, суруйааччы Егоров Николай Васильевич-Аҕырытта Ньукулай, кини төрөппүт уола Егоров Вениамин Николаевич -Айаан Чакыр, хоһоонньут Елена Антонова-Күн Сиккиэрэ, суруйааччы, хоһоонньут Федотова Зинаида Дмитриевна-Дьол Кыыма, Ньурбаттан Тимофей Шестаков -Чоххуруос, Людмила Николаевна Пустолякова-Дьэрэлийэ Күндээр уо. д. атыттар кыттыыны ыллылар, санааларын сайа эттилэр, хоһооннорун аахтылар. Үөрүүлээҕэ, ыччат дьон түһүлгэни ааһа хаампакка, кэлэн кыттыһан, сөбүлүүр бэйиэттэрин хоһоонун доргуччу ааҕан, сэргээн барбыттара – олус кэрэхсэбиллээх уонна кэскиллээх. Тыл сүмэтэ уоҕуран, уохтанан силис тардан саҥа ааттар, саҥа айымньылар тахса-айылла турдуннар диэн алгыс тылбыт баараҕайын, үтүө тылбыт сүмэтин анаатахпыт буоллун.
Татьяна Семенова,
И.Г.Иванов-Уйбаан Нуолур аатынанЭлгээйи олохтоох бибилэтиэкэтэ
