Балаҕан ыйын 6-7 күннэригэр Үөһээ Бүлүү улууһун Нам нэһилиэгэр VIIIс төгүлүн ыытыллар “Тобуруокап көмүс күһүнэ-2024” өрөспүүбүлүкэтээҕи хоһоон көҥүл түһүлгэтэ ыытылынна.
Манна Сунтаар улууһун “Ньургуһун” литературнай түмсүүтэ кыттыыны ылан кэллэ. Бу туһунан Дойдулар икки ардыларынааҕы, Россия уонна Саха сирин Суруйааччыларын сойуустарын кыттыылааҕа, суруйааччы, публицист, тылбаасчыт Валентина Дьячковская-Хара Көмүс сырдатар:
Барыта 14 улуустан 74 айар, суруйар дьоҕурдаах дьон мустубуппут. Дьээбэ Тойон массыынатынан сарсыарда 11.30 чааска айаннаан тиийбиппит. Уолбутугар махталбыт муҥура суох. Биһиги кэннибититтэн кэбээйилэр тиийэн кэлбиттэрэ. Дьааҥы, Орто Халыма аатыттан кыттыбыт дьон кытта бааллар.
Халлаан биллэ сөрүүн да буолар, дьон- сэргэ сөбүлээн сылдьар эбит. Д.Ф. Наумов, Сайа,, В.Б.Окорокова курдук бөдөҥ дьоммут кэлэн кыттыыны ылан салайса сылдьаллара саныахха да астык. Биллэн турар, биһиги Арчыламмыт үлэ-хамнас үөһүгэр сырытта. Кинилиин Уол Сарсын сэргэстэстэ. Саргы Куо уонна Уйбаан Уххан эмиэ бааллар. Норуот тапталлаах кыыһа Айталыына Мойтохонова туойан доллоһутан сүрэхпитин долгутта. Уопсайынан да, ырыа-хоһоон эйгэтигэр ыбылы ылларбыт дьон мустубут буоламмыт, хас эмэ сүүс хоһоон-ырыа тохтоло суох суккулунна. Ситэн ааҕыллар да кыаҕа суох курдук үөрүүлээх түгэннэр буолан аастылар.
Нам нэһилиэгин баһылыга А.И. Кардашевскай киһиэхэ сүрдээх болҕомтолоох салайааччы эбит. Биһиги түүннэри төннөр кыахпыт суоҕун учуоттаан, хонор сир була охсон биэрдэ. Үгүспүт да оскуолаҕа түһүүлэнэн сырыттыбыт. Оскуола эйэҕэс үлэһиттэригэр, салалтатыгар улаханнык махтанабыт.
Бастакы күн ыкса киэһэтигэр Бүлүү эбэ үрдүгэр норуот сүгүрүйэр поэта П. Н. Тобуруокап «Көмүс күһүнүгэр» аналлаах түөлбэҕэ мустан, кутааҕа буспут собону уонна ис үөрэтин амсайдыбыт. Биллэн турар, бу киэһэ тохтоло суох ырыа-тойук суккулунна, хоһоон ааҕыыта салҕанна. Түмүгэр, түөрт кырачаан тууһут уолаттар чиэстэннилэр. Биэс муҥхаһыт тута ууттан таһааран, дьоҥҥо-сэргэҕэ сыа балыгы амсаттылар.
Биһиги төһө кыахпыт тиийэринэн барытыгар кыттыһан истибит. Хоһоон бөҕө аахтыбыт, ыллаатыбыт-туойдубут. Дьээбэ Тойоммут уон хоһоонноох күрэскэ уонна түөрт строкалаах тута хоһуйууга кытынна. Уолбут бу киирсиигэ биир бастыҥ кыттааччынан бэлиэтэннэ. Салайааччыбытын Сыралыны уонна Кутанабыт эдэр мелодиһын Айталыына Слободчикованы ыҥыран ылан НВК-ҕа уһуллулар. Айталыына «Ньургуһун» кыттыылааҕа буоларга сөбүлэстэ.
Бэйэ-бэйэни хоһуйсууга Сыралы уонна Дьээбэ Тойон кыттыыны ыллылар. Оттон мин тыл оонньуутун ыыттым. Бириис ылбыт дьонум олус соһуйдулар даҕаны, үөрдүлэр даҕаны.
Биһигини кытта аара Ньурбаттан С. А. Стручкова-Саргы Маалыкай аргыстаһан барсыбыта. Далбар хотуммут сүрдээх кэпсээннээх уонна талааннаах киһи эбит. Уон хоһоонноохтор сүрүн бириистэригэр тиксэн бэйэтэ да, биһигини да олус үөртэ. Д.Н. уонна А. М. Скобелевтар кинигэлэрин кыһаларыгар 100 ахсааннаах кинигэтин буор-босхо бэчээттэтэр бырааптанна.
Бу тэрээһини Д. Ф. Наумов дьонун-сэргэтин кытта көҕүлээн ыыппыта уонча сыл буолбут эбит. Маннык мааны дьоммутугар махтаныах эрэ кэриҥнээхпит. Этэҥҥэ эрэ буолларбыт өссө да кыттыахпыт турдаҕа.
