Бүгүн, балаҕан ыйын 26 күнүгэр, Сунтаар киин бибилэтиэкэтигэр Россия үөрэҕириитин туйгуна, «Учууталлар учууталлара», «Учууталлар династиялара» бэлиэлэр хаһаайкалара, Саха сирин үөрэҕириитин Бочуоттаах үлэһитэ, Сунтаар улууһун Бочуоттаах олохтооҕо, Сунтаар нэһилиэгин ытык олохтооҕо, норуот маастара Изабелла Ильинична Попова “Дорогие сердцу моему…” диэн саҥа кинигэтэ сүрэхтэннэ.
Бу орто дойдуга кэлбиттэр бары да олохпут сайдарын туһугар тугу эрэ утумнааҕы, үйэлээҕи оҥорор аналлаахпыт, ону тэҥэ ааспыты ырыҥалыыр, билиҥҥини билэр уонна кэлэри кэрэһэлиир кэрэ айылгылаахпыт. Дьэ, ити санаанан салайтаран, Изабелла Ильинична 80 сааһынан олоҕун устата алтыспыт дьүөгэлэригэр анаан саҥа кинигэ суруйан таһаарда. 80 саас диэн олорбут олоҕу анааран көрүү, сынньалаҥ, уоскулаҥ кэмэ буоларын дакаастаан, ааптар үбүлүөйүн көрсө сүрэҕэр чугас дьүөгэлэрин кинигэҕэ хатаабыт. Манна бааллар оҕо саас, эдэр-эмэн кэмнэр араас күлүүлээх даҕаны сонньуйуулаах даҕаны түгэннэрэ.
Саҥа кинигэ “Дани-Алмас” издательствоҕа бэчээттэнэн тахсыбыт, барыта 88 страницалаах, 3 түһүмэхтэн турар, Изабелла Ильинична бэйэтин архыыбыттан хаартыскалардаах, барыта 16 ахтыы киирбит. Аныгы олох ирдэбилинэн куйаар кодтаах 2 ырыата киирдэ.
Бу кинигэ дьүөгэлэригэр, кинилэр оҕолоругар, сиэннэригэр уонна кинилэри билэр дьоҥҥо ананар.
Үтүө күн түһүлгэтин Наталия Эконова “Көҕөн кус оҕолоругар алгыс тойугун”, Дьырыбына Дьырылыатта олоҥхоттон “Хобуоччу Хопчороолдьун эмээхсин тойугун” туойан арыйда. Бу күн үөлээннээхтэр мустан истиҥ эҕэрдэлэрин эттилэр, умнуллубат түгэннэрин ахтан-санаан аастылар. Изабелла Ильинична дьүөгэлэрэ, кэллиэгэлэрэ, Сунтаар иккис нүөмэрдээх орто оскуолатын учууталлара, Сунтаар улууһун култууратын уонна айылгытын салалтатын салайааччыта Саргылана Омукова, С.А. Зверев-Кыыл Уола аатынан түмэл салайааччыта Альбина Федорова, Л.А.Попов аатынан Сунтаардааҕы киин бибилэтиэкэ дириэктэрин солбуйааччы Анатолий Львов, Сунтаар нэһилиэгин бэтэрээн учууталлара, бииргэ үөрэммит доҕотторо Лидия Петрова, Юрий Мекумянов уонна Изабелла дьүөгэтин уола Василий Федоров буолан мустан, саҥа кинигэни бэрт сэргэхтик сүрэхтээтилэр.
Хас биирдии ыалдьыкка Изабелла Ильинична саҥа кинигэтин бэлэхтээн үөрүүлэрэ үрдээтэ.
Түмүккэ кинигэ ис тутулунан биктэриинэ оонньонно, манна Татьяна Божедонова уонна Зинаида Федотова кыайыылаах буоланнар, «Эн арыйдыҥ хоһоон кинигэтин» диэн Н.В.Михалева-Сайа хоһооннорунан сарсын буолар испэктээккэ босхо билиэт бэлэх тутан, үөрүүлэрэ үс бүк үрдээтэ.
Дьэ, ити курдук, Сунтаарбыт ытык олохтооҕо Изабелла Ильинична Попова номнуо төрдүс кинигэтэ сүрэхтэннэ. «Салгыы да кинигэтэ суруйа тур» диэн алгыстаах бу дьоро күн түмүктэннэ.
Суруйда ааҕааччыны кытта үлэлиир салаа.
