Сунтаар улууһун аҕа баһылыгар Григорьев А.В.,
Сунтаар улууһун нэһилиэктэрин баһылыктарыгар
тэрилтэлэр салайааччыларыгар.
“МИН САХАЛЫЫ ААҔАБЫН”
ААХСЫЙА ТУҺУНАН ИҺИТИННЭРИИ СУРУК
Ытыктабыллаах нэһилиэк аҕа баһылыга, тэрилтэ салайааччыта!
Сыл аайы алтынньы 9 күнүгэр Бүтүн Арассыыйатааҕы ааҕыы күнэ ыытыллар. 2007 сыллаахха сэтинньи 24 күнүгэр национальнай ааҕыы бырагырааммата ылыныллан аан бастаан олоххо киирбитэ. Бу бэлиэ күн дойду үрдүнэн ааҕыыга, кинигэҕэ уһуйуллар, интэриэһи тардар араас таһымнаах тэрээһиннэр буолаллар. Сүрүн сыала – Арассыыйа саамай ааҕар дойду буоларын ситиһии. Онон сиэттэрэн “Ааҕар Сунтаар” бырайыак чэрчитинэн Араассыыйаҕа «Учуутал уонна Уһуйааччы”, Сунтаар улууһугар “Төрөөбүт төрүт тыл” сылыгар аналлаах учуутал туһунан саха классик уонна билиҥҥи кэм суруйааччыларын айымньыларынан дорҕоонноохтук “МИН САХАЛЫЫ ААҔАБЫН” улуустааҕы аахсыйа ыытыллар.
Киэн туттар суруйааччыларбыт айымньыларын ааҕан култуурунай, литературнай сибээһи олохтуохха, бөҕөргөтүөххэ, сахалыы ааҕыы эйгэтин кэҥэтиэххэ.
Аахсыйаны алтынньы 9 күнүгэр тэрилтэлэр планеркаларыгар салайааччылар, оскуола дириэктэрдэрэ, оскуолаларынан саха тылын учууталлара, оскуола библиотекардара, уһуйааннар иитээччилэрэ, тэритэлэринэн үлэ коллективтарыгар, дьиэ кэргэҥҥэ оҕолордуун сиэннэрдиин, ыччаттар көхтөөх кыттыыны ыларгытыгар ыҥырабыт.
Аахсыйаҕа кыттыспыккытын биллэрэн тэттик роликтаргытын куйаар ситимигэр бар дьон көрүүтүгэр таһаараргытыгар ыҥырабыт уонна sunlibrary.sakha@mail.ru почтаҕа ыытаргытыгар көрдөһөбүт.
Сунтаар нэһилиэгин тэрилтэлэригэр Николай Габышев “Дьиҥнээх учуутал” кэпсээниттэн быһа тардан ааҕыыны сүбэлиибит. (Кэпсээн текиһин бу сурук сыһыарыытыгар көрүҥ).
Улуус нэһилиэктэригэр олохтоох библиотекалартан сүбэлиир ыйынньыктан талан ылан ааҕаргытыгар сүбэлиибит. (Сүбэ ыйынньыгы сурук сыһыарыытыгар көрүҥ).
Төрөөбүт төрүт тыл сылыгар САХАЛЫЫ ААҔЫЫГА бары кыттыаҕыҥ!
Улуустааҕы тэрийэр сүбэ.