2025 СЫЛ АРАССЫЫЙАҔА АҔА ДОЙДУНУ, САХА СИРИГЭР ИЙЭ ДОЙДУНУ КӨМҮСКЭЭЧЧИЛЭР СЫЛЛАРЫНАН, УЛУУ КЫАЙЫЫ 80 СЫЛЫН КӨРСӨ оскуола ахсын “Сүдү суолталааҕы кэпсэтии” (Разговоры о важном) патриоттуу тыыҥҥа иитэр кылаас чаастара, тэрээһиннэр саҕаланнылар. Бу суолталаах тэрээһиннэргэ олоҕуран Сунтаар нэһилиэгин оскуолаларын үөрэнээччилэригэр биир ыар түгэнинэн 872 күннээх Ленинград куорат блокадатын сырдатар библиотечнай уруоктар ыытылыннылар.
Бүгүн, 2025 сыл тохсунньу 27 күнүгэр, Ленинград Дьоруой-куорат блокадаттан толору босхоломмута 81 сылын бэлиэтээтибит.
Тохсунньу 27 күнүгэр судаарыстыбабыт уонна 1941-1945 сыллардааҕы Аҕа дойду Улуу сэриитин историяларыгар биир бэлиэ күн бэлиэтэнэр. Ленинград диэн тылы иhиттиҥ да, бу Аҕа дойду Улуу сэриитин биир саамай хараастыылаах түгэнэ буолара киhи тѳбѳтүгэр охсулла түhэр. Ол курдук, күн бүгүҥҥээҥи диэри умнуллубакка дьон ѳйүгэр-санаатыгар кѳрдүгэн буолан күөдьүйэ сытар…
“Ленинграды ньиэмэс-фашист халабырдьыттарын төгүрүктээһиннэриттэн толору босхолооһун – бу кутурҕаннаах бэлиэ күн. Блокада 872 күн барбыта уонна 3 мөлүйүөн кэриҥэ киһилээх куоракка сэрии бүтэригэр 500 тыһыынчаттан тахса эрэ киһи хаалбыта. Бүгүн сэрии сылларыгар балтараа мөлүйүөн Ленинград олохтооҕо өлбүтүн туһунан этэллэр. Биһиги ытык иэспит – дьиҥнээх историяны уонна бу хомолтолоох түгэн туһунан өйдөбүнньүгү илдьэ сылдьыы уонна бу туһунан эдэр көлүөнэҕэ тириэрдэр сыалтан Л.А. Попов аатынан киин бибилэтиэкэ Сунтаар 1 нүөмэрдээх, гимназия, лиссиэй уонна Сунтаардааҕы А.И.Иванов аатынан Олимпийскай эрэллэри бэлэмниир оскуола үөрэнээччилэригэр бибилэтиэчнэй уруоктар ыыттылыннылар.
Уруоктарга бу кэмҥэ 34 эдэркээн саха устудьуон оҕолоро түбэһэн, сорохторо тыыннаах ордубатахтара. Биһиги Сунтаарбыт оройуонуттан театральнай институтка үөрэнэ сылдьыбыт биир дойдулаахтарбыт Аҕа дойду сэриитин I, II истиэпэннээх, икки төгүл “Кыһыл Сулус” орденнарынан, “Бойобуой үтүөлэрин” , “Ленинграды ылыы иһин” , “Германияны кыайыы иһин” мэтээллэринэн наҕараадаламмыт Исай Попов уонна “За боевые заслуги”, “За оборону Ленинграда”, “За победу над Германией” наҕараадалардаах Михаил Авелов блокада кыттыылаахтарынан буолалларын үөрэнээччилэргэ билиһиннэрдибит, маны тэҥэ ол ааспыт ыар кэмнэри кэпсиир бэсиэдэ уонна Таня Савичева күннүгүттэн сырдаттыбыт.
Суруйда ааҕааччыны кытта үлэлиир салаа кылаабынай бибилэтиэкэрэ Мария Алексеева
