Сунтаарбыт улууһун көмүс фондатыгар өссө биир саҥа кинигэ эбилиннэ. Ахсынньы 12 күнүгэр С.А. Зверев-Кыыл Уолун аатынан норуот айымньытын киинигэр “100 лет экономической службе Республики Саха (Якутия)” саҥа кинигэ сүрэхтэннэ. Кинигэни Сунтаар улууһун Экономикаҕа управлениятын салайааччыта муниципальнай сулууспа туйгуна уонна ветерана, экономика министерствотын туйгуна, Элгээйи нэһилиэгин бочуоттаах олохтооҕо ЕФРЕМОВА Ия Александровна хомуйан оҥордо.
Саҥа кинигэ 200 ахсаанынан Дьокуускай куоракка “Смик мастер” полиграфияҕа бэчээттэнэн таҕыста. Кинигэҕэ Сунтаар улууһугар экономическай сулууспа историята, үлэлии сылдьыбыт уонна үлэлии сылдьар исписэлиистэр ахтыылара киирдилэр.
Кинигэ уратытынан “Визитные карточки экономистов” диэн түһүмэх буолар. Манна хас биирдии үлэһит хас сыллаахтан үлэлиирэ, наҕараадаалара барыта чопчу сурулла сылдьар. Бүтэһигэр экономическай сулууспа үлэһиттэрэ үлэҕэ, араас хабааннаах тэрээһиннэргэ уонна сынньалаҥҥа түспүт хаартыскалара ситэрэн-хоторон биэрэллэр.
Бу үтүө күн бэйэлэрин эҕэрдэлэрин, үтүө санааларын улууспут аҕа баһылыга Григорьев А.В., нэһилиэктэр баһылыктара уонна убаастанар бэтэрээннэр Корнилова Н.И., Тойбохойтон Петров М.А эттилэр.
Экономическай сулууспа салайааччыта Ефремова И.А. бу эйгэҕэ үлэлии сылдьар исписэлиистэргэ, бэтэрээн үлэһиттэригэр, нэһилиэк баһылыктарыгар, хас биирдии бибилэтиэкэлэргэ кинигэ бэлэх уунна.
Суруйда Л.А. Попов аатынан Сунтаардааҕы киин бибилэтиэкэ ааҕар саалатын сэбиэдиссэйэ Мария Алексеева.
