Саха поэт дьахталларын Саамай сырдык сыдьаайдааҕа, Поэзия уран аатын Илдьэ сылдьар маанылааҕа, Сандаарыйа дьоро күнүн Сардаҥатын уруйдуубут!
Сунтаарга Александра Григорьева-Сандаарыйа алгыстаах сааһын бэлиэтиир үөрүүлээх түһүлгэ буолан ааста. Поэт бэйэтэ Мииринэй куораттан кэлэн истиҥ эҕэрдэлэри тутта, кини хоһоонноруттан таҥыллыбыт уус-уран туруорууну болҕойдо. Партизан култуура дьиэтин сценатын сып-сырдык өҥүнэн таҥыннарбыттара уонна ону чөмчүүк оҕуруо көстүүтүнэн киэргэппиттэрэ Сандаарыйа ис туругар уонна тас көстүүтүгэр, айар үлэтин уран күүһүгэр барытыгар олус сөп түбэһэн дьүөрэлэһэр.
Сандаарыйа саха литературатыгар дьахтар поэзиятын сайыннарбыттартан биир бастакылара уонна биир бастыҥнара. Олох уустук тургутууларын нөҥүө биир да түгэн поэзия ыллыгыттан туораабакка, кинини таҥнарбакка, киниттэн сылайбакка, үрүҥ көмүс чүмэчитин уйан уотун умулларбакка бу сааһыгар тиийэн кэлбит кэрэ уонна хорсун киһи буолар.
Саха суругунан литературата 125 сылын бэлиэтиир үөрүүлээх мунньахха Ил Түмэн бэрэссэдээтэлин бастакы солбуйааччы Александр Жирков Саргылана Гольдерованы норуот поэта буолбутунан эҕэрдэлииригэр кинини кытта Сандаарыйаны холбуу тутан ахтыбыта. Кини этэринэн, университеккэ үөрэнэр кэмнэригэр бу икки кыргыттар поэзия аанньаллара буолан уолаттар санаан да санаалара тиийбэт үрдүгүнэн дайаллар эбит. Сандаарыйа ол кэмҥэ «Күөх түүл» диэн ырыа буолбут хоһоонугар 13-с куорпус уола хоһулларыгар атын куорпус уолаттара күүстээхтик күнүүлүүллэр эбит…
Мин Сандаарыйаны кытта биир төрүттээх-уустаах дьоммут. Мин аҕабынан, кини — ийэтинэн Кыыл Уола-Сэргэй Сибиэрэпкэ чугас аймах буолабыт. Оҕо сылдьан аатырбыт Угут Күөл ыһыаҕар сылдьаары Элгээйигэ тиийэн кинилэргэ түһэрбитин өйдүүбүн. Онно мин поэзия, поэттар тустарынан Шура эдьий дьүөгэлэринээн кэпсэтэриттэн аан бастаан таттара, долгуйа истибитим быһыылааҕа.
Сандаарыйа сырдык лирикатыгар иитиллэн хас да көлүөнэ дьон сүрэхтэригэр кэрэ иэйиини күөдьүттүлэр, олоҕу ураннык көрөргө үөрэннилэр. Кэнники да айымньыларыгар кини үрүҥ өҥү сүтэрбэт, сырдыкка эрэлин ыһыктыбат. Хаан-уруу убайа Кыыл Уолун илбистээх добун тойугун дорҕоонноро өтөн тахса турар суруйууларыгар даҕаны кини аныгы дьахтар сайдам өйүн-санаатын, кылыгырас кылаан кылыһаҕын дьүөрэлии тутан, ис киирбэхтик таҥан киллэрэр ураты дьоҕурдаах.
Билигин Александра Михайловна урут тахсыбыт аҕыйах тиражтаах дьоҕус кинигэлэринэн дуоһуйбакка, дьоһуннаах улахан хомуурунньугун бэлэмнииргэ туруннар. Саҥа кинигэ тахсарын Сунтаар улууһун дьаһалтата өйүө диэн эрэнэбин.
Сандаарыйа бу хоһоонун алыба киниттэн бэйэтиттэн хаһан да арахпатын: Нарыын-нарын ыйдаҥалыы Чахчы сатаан суһумнуубун, Күөх халлааным мичилиҥнэс Хаарыһынан суугунуубун. Көҥүл, көҥүл, өссө көҥүл – Дьолго көтөр кынаттарым, Көҥүл, көҥүл, өссө көҥүл Уоттаах сырдык ыраларым…
САЙА