Бүгүн, ыам ыйын 17 күнүгэр, Саха Өрөспүүбүлүкэтин норуодунай суруйааччыта, биир дойдулаахпыт Наталья Михалева – Сайа үбүлүөйдээх күнүн көрсө Элгээйи нэһилиэгин «Оһуор» култуура киинигэр Сайа талааныгар сүгүрүйээччилэр уонна кини поэзиятын кэрэхсээччилэр «Кыайыы кыыһа Сайа » диэн хоһоон ааҕыытын түһүлгэтин күрэһигэр тоҕуоруһа муһуннулар. Күрэс Сайа олоҕун уонна айымньыларын сырдатар, кэпсиир дьүһүйүүнэн саҕаланна. Ааҕааччы кутун-сүрүн сайан киирэр Сайа хоһооннорун 46 күрэс кыттыылаахтара ис сүрэхтэн долгуйа аахтылар, олортон 15 оскуола үөрэнээччитэ кыттыыны ылбыта сүрдээх кэрэхсэбиллээх. Күрэс кэтэхтэн эмиэ ыытылынна. «Оһуор» КК режиссера Николаева Э.С.,П.Х.Староватов аатынан Элгээйи орто оскуолатын саха тылын, литературатын үрдүк категориялаах учуутала Павлова Л.Н.,Уйбаан Нуолур аатынан Элгээйи модельнай бибилэтиэкэтин главнай бибилэтиэкэрэ Семенова Т.А. күрэс кыттыылаахтарын толорууларын таһымын, айымньы ис хоһоонун көрөөччүгэ тиэрдиилэрин,уустаан-ураннаан ааҕыыларын сыаналаан туран маннык түмүгү таһаардылар.
Улахан дьоҥҥо бөлөҕүнэн ааҕыыга
1 миэстэ — академик В.М.Анисимов аатынан Түбэй орто оскуолатын ааҕар бөлөҕө;
2 миэстэ- Күүкэй нэһилиэгиттэн «Күннээх Күүкэй» ааҕар бөлөх,
3 миэстэ — С.А.Зверев аатынан Элгээйи фольклор түмэлин ааҕар бөлөҕө. Улахан дьоҥҥо соҕотохтуу ааҕыыга
1 миэстэ -Мария Андреева («Сүрэҕим» хоһ.Күндэйэ нэһ.),
2 миэстэ -Татьяна Татаканова («Өтөх ырыата» хоһ. Элгээйи нэһ.),
3 миэстэ-Марианна Спиридонова («Олох» хоһ.,Элгээйи нэһ.).
Оҕолорго бөлөҕүнэн ааҕыыга
1 миэстэ- Элгээйи орто оскуолатын 6 кылааһын уолаттарын ааҕар бөлөҕө (кыл. сал.Ким З.В.),
2 миэстэ-Күндэйэ орто оскуолатын 8 кылааһын оҕолоро.
Оҕолорго биирдилээн ааҕааччыларга
1 миэстэ- Фомина Айсара (Сиэйэ нэһ.,сал. Марина Хомподоева ),
2 миэстэ- Борисов Юра (Түбэй нэһ., сал.Пелагея Слепцова),
3 миэстэ- Николаева Сандаара (Сиэйэ нэһ.,сал. М.Хомподоева).
Дьиэ кэргэттэргэ
1 миэстэ — Элгээйиттэн эдьиийдии балыстыы Елизавета Павлова уонна Екатерина Филиппова толоруулара,
2 миэстэ- Күндэйэттэн үс көлүөнэ кыттыылаах Львовтар дьиэ кэргэттэрэ уонна ийэ олоҥхоһут, оҕолорго олоҥхо кинигэлэрин автора, Толоон нэһилиэгин бочуоттаах олохтооҕо,»Кулуһун» литературнай түмсүү салайааччыта Изабелла Макарова -Толоон Туорааҕа туруорбут бэлэҕин туттулар.
Ону тэҥэ дьүүллүүр сүбэ анал ааттары туттарда, ол курдук
Сайа поэзиятыгар үйэлээх сүгүрүйээччи» анал ааты уонна «Көмүс саас» түмсүү салайааччыта Раиса Николаевна уонна Анатолий Потапович Ивановтар анал бириистэрин СӨ култууратын туйгуна, култуура бочуоттаах бэтэрээнэ Анастасия Михайлова тутта.
Баай ис куттаах ааҕааччы» анал аат Евдокия Захарова ылла уонна «Матери России» туруорбут бирииһин тутта. Саха куттаах ааҕааччы» анал аат Надежда Поповаҕа.
Көрөөччү биһирэбилэ «Марианна Спиридоноваҕа ананнылар. Бастаабыттар «Оһуор» Култуура киинэ туруорбут харчылаах сертификаттарын туттулар. Уйбаан Нуолур аатынан бибилэтиэкэ Сайа айар үлэтин сырдатар улахан кинигэ быыстапкатын тэрийдэ уонна поэзия түһүлгэтин кыттыылаахтарыгар Сайа олоҕун, айар үлэтин төһө билэллэригэр тургутук оҥордо.
Саха ааҕааччытын кутун туппут, үгүс ааҕааччы тапталын, сүгүрүйүүтүн ылбыт Сайа айымньылара өрүү дууһаҕытын байыта, сүрэххитин долгута турдун!!!
