Сайылых ырыата
Түптэ сыта салгыҥҥа тарҕанар,
Торҕо буруо ыраахха тыргыллар,
Ынах сүөһү мэччийэн кэлэр,
Ыанньыйан иһэрин маҥыраан биллэрэр.
Сайылык ырыата, сайылык туоната
Сахаҕа, оо, күндү да буоллаҕа!
Бу курдук куруутун буолуохтун,
Далбарай тайаара туруохтун,
Сыһыыга сылгыбыт тыбыырдын,
Сахабыт саргыта сайыннын!
Саргылана Спиридонова-Кэрэмэс Кийиитэ
Ыам ыйын 22 күнэ — Саха Өрөспүүбүлүкэтигэр Сайылык күнэ. Саха халандаарынан сайыҥҥы күн ааҕыллар. Кэҕэ этэр. Уһун кыһыны этэҥҥэ туораан, күөххэ үктэнэр Ньукуолун күнүгэр алаадьы астаан сири-уоту аһаталлар, Айыылартан өҥ дьыл буоларыгар көрдөһөллөр, ыраастаналлар уонна сайылыкка көһөллөр.
Саха сиригэр тыа хаһаайыстыбатын сайыннарыыга улахан болҕомто ууруллар. 2018 сыллаахха сэтинньигэ Ил Дархан Айсен Николаев ыам ыйын 22 күнүгэр Сайылык күнүн бэлиэтииргэ уураах таһаарбыта. Онон, бүгүн Сайылык күнүн бэлиэтиибит.
