Ньургуһун — саас хаар ууллаатын кытта бастакынан тыллар сибэкки. Ньургуһун элбэх сыллаах үүнээйи, кини лютик сибэкки биир көрүҥэ буолар. Ньургуһун күннээх, кураанах, үрдүк сирдэргэ, ойуур кытыытыгар, алаас халдьаайытыгар, мырааннарга сөбүлээн үүнэр. Ньургуһун нууччалыы аата «прострел», «сон-трава», «подснежник». Ньургуһун аан дойдуга 45 apaaha баар эбит. Холобур, прострел весенний, луговой, крымский, Бунге, горный, золотистый уо. д. а. Онтон Саха сиригэр ньургуһун 7 apaaha баара биллэр. Прострел желтеющий (араҕас) Илин Эҥэргэ, Дьокуускай диэки үүнэр. Прострел раскрытый (халлаан күөхтүҥү-фиолетовай) Алдан, Ленскай, Хоту улуустарыгар уонна Бүлүү эргин үүнэр. Прострел Турчанинова уонна Прострел многонадрезный (фиолетовайдар); Прострел даурский уонна Прострел аянский халлаан күөхтүҥү-фиолетовай) колокольчиктыны сибэккилэр Саха сирин соҕуруу өттүгэр, Верхоянскай хайаларыгар, Лена өрүс үөhэ тардыытынан үүнэллэр. Ону таһынан: Прострел обыкновенный (кыһыллыҥы ньургуһун) үүнэр. Ньургуһун киэҥ сиргэ үүнэр: Европа дойдуларыгар, Америкаҕа, Канадаҕа, Монголияҕа, Кытайга, Белорусияҕа, Украинаҕа, Казахстаҥҥа, Сибииргэ уонна Азияҕа. Ньургуһун сибэкки төһө да элбэх сиргэ үүннэр, син биир кыралаан аҕыйыыр, сүтэр. Кини үүнэр сирин усулуобуйата уларыйарыттан, киһи-cүөhү тэпсэриттэн, ынах-сүөһү мэччийэриттэн, маһы-оту кэрдэллэриттэн, дьон ahapa үргүүрүттэн аҕыйыыр эбит. Ол иһин кинини Кыһыл кинигэҕэ сүтэн эрэр үүнээйи быһыытынан киллэрбиттэр.