Ыам ыйын 15 күнэ — Аан дойдуга дьиэ кэргэн күнэ бэлиэтэнэр. 2024 сыл Арассыыйаҕа Дьиэ кэргэн, Саха сиригэр Оҕо саас, Сунтаар улууһугар Аҕам саастаахтар сылларынан биллэриллибитэ. Ол чэрчитинэн «Тобуллаҕас толкуй, өркөн өй» диэн ааҕар дьиэ кэргэттэр күрэстэрэ ыытылынна. Тэрийээччилэр «Сунтаар нэһилиэгэ» муниципальнай тэриллии, Л. А. Попов аатынан улуустааҕы киин бибилэтиэкэ.
Күрэс сыала-соруга:
— Дьиэ кэргэн болҕомтотун саха уус-уран литературатыгар тардыы;
— Сахалыы уус-уран литератураны ааҕыыны көҕүлээһин;
— Сахалыы ааҕар, литератураны таптыыр дьону булан түмүү, иитии уонна өйөөһүн.
Бу ыытыллыбыт күрэскэ Сунтаар нэһилиэгин көхтөөх ааҕар ыаллара: Прокопьевтар-Егоровтар, Еремеевтар, Ефремовтар, Петровтар, Пустоляковтар, Саввиновтар уонна Тертюховтар кыттыыны ыллылар.
Өркөн өй күрэһэ 4 түһүмэҕинэн ыытылынна. Хас биирдии бэриллибит ыйытыыга кыттааччылар бэйэлэрин хоруйдарын биэрэн ситиһиилээхтик кытыннылар.
Дьүүллүүр сүбэҕэ үлэлээтилэр: СӨ култууратын, үөрэҕириитин туйгуна Иванова З. Я., Л. А. Попов аатынан Сунтаардааҕы киин бибилэтиэкэтин ааҕар саалатын библиограба Иванова М. Х., Сунтаардааҕы оҕо бибилэтиэкэтин сэбиэдиссэйэ Никифорова М. И.
Түмүккэ 1 миэстэни ыллылар: Тертюховтар дьиэ кэргэттэрэ; 2-с миэстэни — Еремеевтар уонна 3-с миэстэни ыллылар Прокопьевтар-Егоровтар. Кыттыбыт дьиэ кэргэттэргэ барыларыгар олохтоох дьаһалта аатыттан махтал, хайҕал суруктар уонна бириистэр туттарылыннылар. Онон, бары билиилэрин хаҥатан, бэлэх тутан үөрэн-көтөн тарҕастылар.
Киһи киһи буолуута, сайдыыта дьиэ кэргэнтэн саҕаланар. Киһи-аймах сыаннастара, култуурата, көлүөнэлэр солбуһуулара барыта дьиэ кэргэҥҥэ иитиллэр. Дьиэ кэргэн – общество тулхадыйбат төрдө, омук сайдыахтаах инникилээх кэскилэ. Кини хайдах туруктааҕыттан, хайдах- туох дьаһанан олороруттан бүтүн норуот олоҕо тутулуктаах буоларын умнумуоҕуҥ.
Ааҕааччыны кытта үлэлиир салаа
