Бэс ыйын 13 күнүгэр С.А. Зверев – Кыыл Уолун аатынан норуот айымньытын киинигэр “Чылбынык аҕа ууһа. 1-кы Нөөрүктээйи. Тэҥкэ нэһилиэгэ” диэн саҥа кинигэ сүрэхтэннэ.
Кинигэни СӨ үөрэҕириитин туйгуна, Сунтаар нэһилиэгин бочуоттаах олохтооҕо, норуот маастара, билигин Дьокуускай куорат муниципальнай архыыбыгар архивист-IT специалиһынан үлэлиир Афанасий Афанасьевич Герасимов, Сунтаар улууһун, Сунтаар нэһилиэгин бочуоттаах олохтооҕо, СӨ үөрэҕириитин бочуоттаах үлэһитэ, РФ үөрэҕириитин туйгуна Борис Егорович Герасимов уонна Валерий Никифорович Степанов хомуйан оҥордулар. Саҥа кинигэ “Дани-Алмас” типографияҕа 120 ахсаанынан, 280 сирэйдээх бэчээттэнэн таҕыста. Кинигэ таһын худуоһунньук идэлээх балыстара Лидия Юрьевна Николаева уруһуйдаабытын графическай программаҕа Афанасий Герасимов киллэрэн оҥорбут.
Былыр өбүгэлэрбит төрүттэрин тоҕус көлүөнэҕэ диэри билэллэрэ диэн уос номоҕо баар. Кинигэҕэ Чылбыныктан саҕалаан, быйыл саҥа күн сирин көрбүт кырачааннары киллэрэн туран суруллубут аймах төрүччүтэ сурулунна. Онон, бу аймах олорон ааспыт төрүттэрин ааттарын-суолларын, төрөөбүт сылларын билэр кыахтаннылар. «Чылбынык аҕа ууһа» кинигэҕэ сэттэ-аҕыс көлүөнэ дьоно-сэргэтэ, олоҕо-дьаһаҕа сурулунна. Кинигэ уратытынан ахтыылары сэргэ хаартыскалаах төрүччү бииргэ киирбитэ, онно салгыы саҥа көлүөнэ сурулларыгар сөптөөхтүк төрүччүнү толорон иһиигэ табыгастаахтык таҥыллыбыта буолар.
Санатар буоллахха, 1992 сыллаахха Афанасий Афанасьевич Герасимов эскиһынан саҥалыы оҥоһуллубут тупсаҕай көрүҥнээх Аар баҕах биһиги Сунтаарбыт сынньалаҥ пааркатын киэргэтэр, ону таһынан улууспут гиэрбэтигэр киирбитин биһиги элбэхтик киэн тутта көрөбүт.
Бу үтүө тэрээһин Валентина Яковлева алгыһынан саҕаланна, салгыы киэҥник тарҕаммыт Чылбынык аҕа ууһун сиһилии кэпсиир улахан стендэни Афанасий Афанасьевич аймахтарыгар олус интэриэһинэйдик билиһиннэрдэ. Кинигэ биһирэмигэр Чылбынык аҕа ууһуттан түөрт бииргэ төрөөбүттэр сыдьааннара кыттыыны ыллылар. Ол курдук, Дьулурҕа Киргиэлэй сыдьааннарын аатыттан «Кириэстээх СХПК” бэрэссэдээтэлэ Иннокентий Вячеславович (Сунтаар), Ыстаппаан сыдьааннарын аатыттан Елизавета Ефониевна Корнилова (Тойбохой), үлэ бэтэрээнэ Алькор Григорьевич Тихонов (Куокуну), Кирилэ оҕонньор сыдьааннарын аатыттан Алена Николаевна Нижегородова (Сунтаар), Мэхээлэ сыдьааннарын аатыттан Евгений Прокопьевич Герасимов (Тойбохой) кэлбиттэр.
Эҕэрдэ ырыатын Тэҥкэ кийиитэ Розалия Сидорова-Ымыычаана бэлэх уунна. Сунтаар улууһун үөрэҕириитин салалтатын салайааччыта Борис Николаевич Васильев, Сунтаар улууһун култууратын уонна айылгытын салалтатын салайааччытын солбуйааччыта Саргылана Васильевна Конобулова, Сунтаар нэһилиэгин баһылыга Эдуард Егорович Филиппов, Тэҥкэ нэһилиэгин баһылыга Николай Владимирович Лидочен, Бордоҥ нэһилиэгин кылаабынай бибилэтиэкэрэ Виктория Лукина уонна биирдиилээн кинигэни сыаналааччылар, төрүччүнү сэргээччилэр кэлэн эҕэрдэлээтилэр. Афанасий Герасимов эҕэрдэлэргэ харда кинигэтин бэлэх уунна.
«Уруу ырааҕа, уу чугаһа үчүгэй» диэн өс хоһоонугар этиллэринэн, төрүччүгүн үчүгэйдик билэр буоллаххына, ыал буолууга алҕас тахсыбат, саха омук кэхтибэт, эстибэт. Билиигэр билии, санааҕар санаа эбиллэр, дьон үөрүүтүн үллэһиннэҕинэ ааптар санаата, сүргэтэ көтөҕүллэр» — диэн кинигэ сүрэхтэниитин истиҥ тылларынан ааптар Борис Герасимов тумуктээтэ.
Л.А.Попов аатынан Сунтаардааҕы киин бибилэтиэкэ ааҕааччыны кытта үлэлиир салаа
