Ахсынньы 9-10 күннэригэр «Чолбон» сурунаал төрүттэммитэ 100, бастакы эрэдээктэрэ А.И.Софронов төрөөбүтэ 140 сылларыгар аналлаах «ЧОЛБОН ӨЙ КҮРЭҺЭ. УЛАХАН ООННЬУУ» бастакы түһүмэх–тургутуу И.Г.Иванов-Уйбаан Нуолур аатынан Элгээйи, Л.А. Попов аатынан Сунтаар, Арыылаах, Тойбохой бибилэтиэкэлэригэр буолан ааста. Күрэс сыала-соруга: саха уус-уран литературатыгар болҕомтону тардыы, сахалыы уус-уран литератураны ааҕыыны көҕүлээһин, сахалыы ааҕар, литератураны таптыыр дьону булан түмүү уонна өйөөһүн.
Уһун Күөлтэн “Арыылаах” Елена Ноговицына, Фекла Григорьева, Станислав Ноговицын, Тойбохойтон “Чолбон” Татьяна Михайлова, Елена Андреева, Николай Егоров, Элгээйиттэн “Элгээйи уоттара” Людмила Павлова, Надежда Петрова, Екатерина Филиппова, Сунтаартан Михаил, Наталья Тимофеевтар дьиэ кэргэттэрэ уонна «Сандаар» Алена Ксенофонтова, Ирина Лукина, Александра Николаева көхтөөх кыттыыны ыллылар. Хамандаалар күрэс түөрт түһүмэхтэн турар «А.И.Софронов-Алампа олоҕо, айар үлэтэ», «Чолбон» сурунаал уонна саха литературата», «Саха театра», «Билиҥҥи кэм литературата» ыйытыктарга хоруйдаатылар. Түмүккэ “Чолбон” уонна “Арыылаах” хамаандалара-36 очко, Элгээйи-32 очко, Тимофеевтар-23 очко, ”Сандаар”–22 очко ыллылар. Тэҥ бааллаах хамаандалар эбии блиц ыйытыктарга хоруйдаатылар. Күрэс түмүгүнэн очколарынан 1-кы “Чолбон”, 2-с “Арыылаах” уонна 3-с “Элгээйи уоттара” хамаандалара буоллулар. Кыайбыт хамаанда өрөспүүбүлүкэтээҕи түһүмэххэ кыттыахтаах. Бары кыттааччыларбытыгар махталбытын тириэрдэбит.
Түмүк түһүмэх (өрөспүүбүлүкэтээҕи түһүмэх) Дьокуускай куоракка ыытыллыаҕа. 4 бастыҥ көрдөрүүлээх хамаанда кылаан оонньуута «САХА» НКИК көрдөрүллүөҕэ. Бастаабыт хамаанда сыаналаах бирииһинэн наҕараадаланыаҕа.
Методическай-информационнай салаа үлэһитэ Алена Портнягина
