«Үрүҥ торуоска» күнүн сүрүн сыалынан харахтара көрбөт уонна мөлтөхтүк көрөр дьоҥҥо уопсастыба болҕомтотун тардыы, тулуурдаах сыһыаны олохтооһун, инникигэ эрэли үөскэтии буолар. Ол курдук, алтынньы 24 күнүгэр Үрүҥ торуоска күнүн чэрчитинэн харахтара көрбөт уонна мөлтөхтүк көрөр дьоҥҥо Л.А.Попов аатынан Сунтаар киин библиотекаҕа көрбөттөр уопсастыбаларын кытта «Дьэрэкээн иһит» диэн гиипсэнэн араас быһыылаах шкатулкалары оҥорорго маастар кылаас буолан ааста. Маастар кылааһы «Сүүтүк» мастерской хаһаайката Мирослава Уарова ыытан олус туһалаах, бэрт сэргэх көрсүһүү буолла. Кэлбит ыалдьыттарбыт астынан, элбэҕи билэн-көрөн бардылар. «Бэйэбит даҕаны маастар кылаас ыытар буоллубут» диэн гиипсэттэн оҥорбут оҥоһуктарын ылан илии тутуурдаах, үөрэн-көтөн, махтанан тарҕастылар. Санатар буоллахха Сунтаар киин бибилэтиэкэ иһинэн «Забота» диэн хараҕынан мөлтөхтүк көрөр уонна көрбөттөр дьоҥҥо аналлаах кулууппут үлэлээбитэ номнуо 20 сыл буолла. Бу кулууппутугар улуус үрдүнэн элбэх дьоннордоохпут, араас тэрээһиннэрбитигэр көхтөөхтүк кыттан үөрдэллэр. Маны таһынан ааҕар саалаҕа улахан ширииптээх, брайл системанан оҥоһуллубут кинигэлэр уонна аудиокинигэлэри уларсан ааҕыаххытын, истиэххитин сөп. Онон күндү хараҕынан хааччахтаах дьоммутун биһиги өҥөбүтүнэн туһаныҥ диэн ыҥырабыт.
