Олунньу 20 күнүгэр “Бартыһаан” норуот айымньытын киинин балаҕаныгар Аҕа дойдуну көмүскээччилэрин күнүн көрсө, үс көлүөнэ эр дьонугар аналлаах «Төрөөбүт дойдуга бэриниилээх буолуу» интеллектуальнай оонньуу ыытылынна. Күрэхтэһии саҕаланыан иннинэ Сунтаар нэһилиэгин баһылыга Эдуард Егорович эҕэрдэ тылын эттэ. Хамаандаҕа 5-тии киһилээх үс күлүөнэ эр бэрдэрэ күөн көрүстүлэр. Ол курдук, “Эрдьигэннэр” (аҕам саастаахтар), “Күн оҕолоро” (Сунтаар технологическай колледжын устудьуоннара) уонна Сунтаар 1-кы нүөмэрдээх оскуолатын үөрэнээччилэрэ 4 түһүмэхтээх тургутугу аастылар. 1-кы түһүмэххэ Аҕа дойду көмүскээччилэрин күнүгэр аналлаах ыйытыктарга эппиэттээтилэр, 2-с түһүмэх Сунтаар нэһилиэгэ төрүттэммитэ 260 сылыгар аналлаах боппуруостарга хоруйдаатылар, 3-с түһүмэх (Т.У.О.С.) толкуйдатарга, умсугутарга, оонньоторго, сынньатарга аналлаах боппуруостарга бириэмэҕэ эппиэттээтилэр уонна бүтэһик түһүмэххэ олус интэриэһинэй проектнай үлэлэри көмүскээтилэр. Дьүүллүүр сүбэҕэ үлэлээтилэр Сунтаар улууһун бэтэрээннэрин сэбиэтин бэрэссэдээтэлэ Васильев Афанасий Кириллович, Л.А. Попов аатынан Сунтаардааҕы киин бибилэтиэкэ ааҕар саалатын сэбиэдиссэйэ Федорова Елена Сергеевна, Сунтаар нэһилиэгин баһылыгын солбуйааччыта Федоров Федор Семенович.
Күрэх үөрүүлээх түмүктүүр чааһыгар Сунтаар улууһун бэтэрээннэрин сэбиэтин бэрэссэдээтэлэ Афанасий Кириллович Васильев кыайыылаахтары биллэрдэ. Ол түмүгүнэн 1-кы миэстэни ыллылар “Эрдьигэннэр”, 2-с миэстэ “Күн оҕолоро”, 3-с миэстэ Сунтаар бастакы нүөмэрдээх оскуолатын үөрэнээччилэрэ.
Кэлэр көлүөнэ ыччаты патриотическай тыыҥҥа иитиигэ, төрөөбүт дойдуну таптыырга, бэриниилээх буолууга иитэр — үөрэтэр сыаллаах интеллектуальнай оонньууну тэрийэн ыыттылар Сунтаар нэһилиэгин бэтэрээннэрин сэбиэтин бэрэссэдээтэлэ Кокорева Наталия Софроновна, «Сунтаар нэһилиэгэ” муниципальнай тэриллии, Л.А. Попов аатынан Сунтаардааҕы киин бибилэтиэкэ, “Бартыһаан” норуот айымньытын киинэ.
Бу курдук инникитин даҕаны патриотическай иитиигэ аналлаах тэрээһиннэр тиһигин быспакка ыытылла туруохтара диэн эрэнэбит.
Ааҕааччыны кытта үлэлиир салаа.
