Алтынньы 19 күнүгэр Түбэйгэ «Алгыс» култуура киинигэр нэһилиэк суруйар дьоҕурдаах дьонун кытары көрсүһүү буолла. «Кырсаада» түмсүү 6 киһилээх.
Быйыл Евсеев М.М — Кураһаай Мэхээлэ 75 сыллаах үбүлүөйэ. Айыылартан айдарыылаах алгысчыт, олоҥхоһут, ырыа – хоһоон айааччы, учуутал – уһуйааччы, мас ууһа. Кини икки кинигэтэ, Мексикаҕа уонна 65 сааьыгар оҥоһуллубут альбомнара дьон көрүүтүгэр турдулар.
СӨ үөрэҕириитин туйгуна, интернациональнай суруйааччылар түмсүүлэрин чилиэнэ, суруйуу араас көрүҥэр дэгиттэр талааннаах, сахалыы-нууччалыы суруйар дьоҕурдаах. Мария Матвеевна — Күн Мичээрэ буолар. Кини айымньылара хас да омук тылынан суруллан, аан дойду таһымыгар таҕыста. Аҕыйах хонуктааҕыта уонча хоһооно кытайдыы тылбаастанан «Шанхай» альманаахха бэчээттэннэ. Бу саҥа кинигэни кытта автор таһааттарбыт уонча кинигэтэ, хомуурунньуктар, Россия иһинэн ыытыллыбыт күрэстэргэ кыттыбытын туоһулуур удастабырыанньалар, мэтээллэр дьон болҕомтотун тартылар. Киэҥ сиринэн сылдьан кыттыспыт тэрээһиннэрин хаартыскаҕа хатаабытын, музейдары көрбүтүн күөх экраҥҥа бэркэ сэргээн көрдүбүт. Күн Мичээрэ бэйэтэ да кэпсээнэ, сэһэнэ үгүс буолан биэрдэ. Кэлбит дьоҥҥо барыларыгар соҕурууттан аҕалбыт таҥара чүмэчилэрин, оҕолорго лампысыай хампыаты түҥэттэ.
Хоһоон, проза, остуоруйа суруйар, хас да кинигэлээх, Л.Н Понохова — Тумара кэпсээнин иһиттибит, Айымньыларын ханна үөскээбит устуоруйатын, ханна бэчээттэнэн киэҥ эйгэҕэ тахсыбытын билбэт дьон бэркэ сэргээн иһиттилэр. Түбэйгэ Хордоҕой ойуун кэлэ сылдьан араас хайысхалаах эмтээх, ыраастыыр мастар баалларын булан көрдөрөрүгэр сылдьыспытын хаартыннаан сирдэтэн «Кырсаада» айар түмсүү сылдьыспытын тоһоҕолоон кэпсээтэ.
Архангельская А.А Түбэй оскуолатын дириэктэрэ, СӨ үөрэҕириитин туйгуна оскуола эрдэҕиттэн хоһоон, ырыа айарын туһунан кэпсээтэ, хас да хоһоонун ааҕан иһитиннэрдэ. Күн Мичээрин улахан ситиһиитинэн эҕэрдэлээн туран « Кырсаада» айар түмсүү аатыттан бэлэхтэрин туттарда.
Мария Матвеевна нэһилиэк, улуус олоҕор мэлдьи көхтөөх кыттыыны ылар. Ол курдук, Кириэстээххэ кинигэ сүрэхтэниитигэр, А.С. Пушкин күнүгэр аналлаах тэрээһиннэргэ, улуус ыһыаҕар ыытыллыбыт норуодунай суруйааччы Н.В.Михалева — Сайа хоһооннорун ааҕыыга, норуодунай суруйааччы Дмитрий Наумовтыын көрсүһүүлэргэ кыттыбыта. Дьиэ кэргэнинэн олоҥхону ааҕыыга 1-кы миэстэ, Санкт-Петербург куоракка ыытыллыбыт «Наследие литературы ХХI века» 2-с истиэпэннээх лауреат, анал уордьанынан, » За вклад в пополнение библиотечных фондов» мэтээлинэн, «Золотое перо русской литературы» бэлиэнэн наҕараадаламмыта, икки хоһооно хомууруннукка киирбитэ.
Кэлбит дьон бэркэ сэргэхсийэн, көрсүһүүттэн астынан, махтал тыллаах тарҕастылар.
Мира Потапова, Түбэй
