Кулун тутар 27 күнүгэр Л.А. Попов аатынан Сунтаар киин бибилэтиэкэтигэр СӨ Суруйааччыларын сойууһун чилиэнэ, “Сунтаар улууһун култууратын сайдыытыгар кылаатын” иһин бэлиэ хаһаайына, Сиэйэ сэлиэнньэтин ытык-мааны дойдулааҕа Зинаида Федотова-Дьол Кыыма «Киһи барыта кэрэхсэнэр кэрэлээх» уонна «Киһи буолан килбэй» диэн саҥа кинигэлэрин сүрэхтэниитэ олус истиҥник, иһирэхтик ааста.
Бу дьоро түһүлгэҕэ ааптар кинигэҕэ киирбит дьоруойдарын биир-биир бэйэтин хараҕынан хайдах көрөрүнэн арыйталаан, дьоҥҥо-сэргэҕэ билиһиннэртэлээбитэ ураты буолла. «Киһи барыта кэрэхсэнэр кэрэлээх» бу кинигэҕэ холобур буолар, улахан олоҕу олорбут дьоннор олохторо дьоҥҥо-норуокка, кэлэр кэнчээри ыччакка кэпсэлгэ сылдьаннар, уос номоҕор хааланнар, сойбот сонун, кэрэ кэпсэл буоллаллар. Дьол Кыыма кинигэтин хас биирдии түһүмэҕэр олоҕун усталаах-туоратыгар чугас билсэр дьоннорун сырдатта. Ол курдук төрөөбүт-үөскээбит Сиэйэтин ытык-мааны дьоннорун, дьолугар көрсүбүт дьүөгэлэрин, Сунтаар кэрэ киэргэллэрин, быйаҥнаах Бордоҥун үтүө-мааны дьонун уонна Кириэстээх нэһилиэгин кэрэхсэнэр киэргэллэрин арылхайдык арыйбыта кэрэхсэнэр.
“Киһи буолан килбэй” кинигэҕэ ааптар саха норуотун уус-уран тылынан айымньылара, кэпсээннэрэ киирдилэр.
Кинигэ сүрэхтэниитигэр Зинаида Дмитриевна чугас дьүөгэлэрэ, ыкса алтыһар доҕотторо уонна ыаллара кэлэн эҕэрдэлээтилэр. Саамай долгутуулаах түгэнинэн буолла ыраах Украина сириттэн СӨ суруйааччыларын сойууһун чилиэнэ, суруйааччы Валерий Никифоров — Суор Уола уонна Сунтаар чаҕылхай уола Василий Спиридонов видеоэҕэрдэлэрэ буолла, маны сэргэ Василий Спиридонов Дьол Кыымын хоһоонугар ырыа суруйбутун ыллаан иһитиннэрдэ. Ыҥырыылаах ыалдьыттар бары үөрэ, долгуйа иһиттилэр, этэҥҥэ буолууну баҕара хааллылар.
Суруйда ааҕар саала кылаабынай бибилэтиэкэрэ Мария Алексеева
