2025 сыл — Арассыыйаҕа аҕа дойдуну көмүскээччилэр, Сахабыт сиригэр Ийэ дойдуну көмүскээччилэр сылларынан биллэриллибитэ. Аҕа дойду Улуу сэриитэ биир саамай сүҥкэн суолталаах биһиги историябыт үтүмэн үгүс киһи хаанынан суруллубут ыар страницата буолар. Бу сэрии кими да тумнубатаҕа: хас биирдии ыал, кыратыттан кырдьаҕаһыгар диэри бары Улуу Кыайыыны уһансыбыттара. Биһиги Сунтаарбыт улууһун дьоно-сэргэтэ ол ыар сылларга эмиэ туора турбакка бэйэтин күүстээх үлэтинэн, улуу кыайыыны аҕалсыбыта.
Быйыл Улуу Кыайыы 80 сылыгар ананан тахсыбыт “Сэрии сылларын оҕолоро-тыйыс кэм тыыннаах туоһулара” кинигэҕэ сэрии сылларын оҕолорун ахтыылара, кинилэр тустарынан ыстатыйалар хомуллан киирдилэр. Оонньоммотох оҕо сааһы, аччыктааһыны-хоргуйууну, тоҥууну-хатыыны билбит, холкуос үлэтигэр улахан дьону кытары тэҥҥэ үлэлээбит сэрии сылларын оҕолоро-тыйыс кэм тыыннаах туоһулара буолаллар. Саҥа кинигэни хомуйан оҥордо Сунтаар улууһун үөрэҕириитин эбии үөрэхтээһин уонна иитиигэ үлэ салаатын сэбиэдиссэйэ Александра Павлова.
Кинигэ биһирэмигэр кыттыыны ыллылар “Барҕарыы” национальнай пуонда дириэктэрэ, норуот дьокутаата Афанасий Постников, Сунтаар улууһун дьаһалтатын социальнай салаа салайааччыта Тамара Иванова, Сунтаар улууһун бэтэрээннэрин сэбиэтин бэрэссэдээтэлэ Афанасий Васильев, Сунтаар нэһилиэгин баһылыга Эдуард Егорович, Сунтаар улууһун үөрэҕириитин салалтатын салайааччыта Борис Васильев, Сунтаар улууһун ыччат политикатын салайааччыта Трофим Иванов, Бордоҥ баһылыга Константинов Уаров уонна Түбэй, Арыылаах, Дьаархан, Бүлүүчээн, Кэппэндээйи, Сунтаар нэһилиэктэрин олохтоохторо кыттыыны ыллылар.
Үтүө күн түһүлгэтигэр Сунтаардааҕы оҕо дьоҕурун сайыннарар киин үөрэнээччилэрэ Татьяна Игнатьева туруорбут “Оонньоммотох оҕо саас” диэн испэктээгин быһа тардан көрдөрөн дьон сэҥээриитин ыллылар. Кэлэр нэдиэлэҕэ бу оҕолор Москва куоракка норуоттар икки ардыыларынааҕы бэстибээл-күрэскэ кытта бараары сылдьаллар, ситиһиини баҕарабыт.
Бу курдук олох, ил-эйэ туһугар туруулаһыыны сырдатар, оонньооботох оҕо сааһы эттэринэн-хааннарынан билбит биир дойдулаахтарбыт тустарынан кинигэ сүрэхтэниитэ олус истиҥник, иһирэхтик ааста.
Кинигэ сүрэхтэниитэ минньигэс астаах сандалынан, уопсай хаартыскаҕа түһүүнэн түмүктэннэ.
Ааҕааччыны кытта үлэлиир салаа
