Бэс ыйын 21 күнүгэр, Сунтаар уйгулаах ыһыаҕар, айыылартан айдарыылаах, ийэ сиртэн этитиилээх, аар тайҕа аптаах ырыаһыта, саха тыллаах айгыр дьаралык алгысчыта, бэйэтин омугун культуратын, искусствотын бары салааларыгар, көрүҥнэригэр уһулуччу улахан тус кылаатын киллэрбит, өбүгэлэрин түҥ былыргыттан үйэлэри нөҥүөлээн илдьэ кэлбит үгэстэрин, итэҕэллэрин, төрүт культуратын үөрэтэн, билэн, ону тилиннэрэн, аныгы көлүөнэҕэ тиэрдэн аҕалбыт, төрөөбүт норуотугар үтүөнү, сырдыгы, кэскили эрэ түстээбит, айымнылары үйэлэри сибээстээбит, сулустуу өрө күлүмнээн ааспыт саха омук киэн туттар, сүгүрүйэр ытык киһибит РСФСР култууратын үтүөлээх үлэһитэ, СССР суруйааччыларын сойууһун чилиэнэ, Саха АССР искусстволарын үтүөлээх диэйэтэлэ, Үлэ Кыһыл знамя уордьанын икки төгүллээх кавалера, Сунтаар улууһун Бочуоттаах олохтооҕо, норуот ырыаһыта Сергей Афанасьевич Зверев-Кыыл Уола төрөөбүтэ 125 сылыгар аналлаах «Сэргэй Зверев-Кыыл Уола үөскээбит эйгэтэ уонна айымньылаах алтыһыыта» диэн саҥа кинигэ биһирэмэ буолан ааста. РФ үрдүк үөрэхтээһинин Бочуоттаах үлэһитэ, СӨ билимин үтүөлээх диэйэтэлэ, тыл үөрэҕин билимин дуоктара, бэрэпиэссэр, П.А.Ойуунускай аатынан бириэмийэ лауреата, Сунтаар, Дьааҥы улуустарын Бочуоттаах олохтооҕо, олоҥхону уонна олоҥхоһуттары чинчийээччи, үөрэтээччи, үйэтитээччи, тарҕатааччы, фольклорист В.В.Илларионов кыыһынаан дассыан Т.В.Илларионовалыын биир дойдулаахтарын Сергей Афанасьевич Зверев туһунан үөскээбит эйгэтин уонна оҕо сааһыттан саҕалаан айымньылаах алтыһыытын арыйан көрдөрөр ис хоһоонноох кинигэни бэчээккэ бэлэмнээн таһаардылар.
«Арктик-Каптал» генеральнай дириэктэрэ, «Тоҕус оһуордаах түһүлгэ» Өрөспүүбүлүкэтээҕи норуот уус-уран айымньытын күрэһин, Кыыл Уолун албан аатын сүгүрүйээччитэ, үрдүк аатын үйэтитээчитэ Евсеев Матвей Николаевич бу кинигэ тахсарыгар үп-харчы өттүнэн күүс-көмө буолла. Үөрүүлээх дьоро күҥҥэ биһиги биир дойдулаахпыт кинигэ ааптара Василий Илларионов араас кэмҥэ бэйэтэ уонна кини көрдөһүүтүнэн суруллубут ахтыылар итиэннэ профессор бэйэтэ норуот талба талааннааҕын туһунан суруйбут ыстатыйалара түмүллэн киирбиттэрин сиһилии сырдатта уонна Сэргэй Сибиэрэп айымньылаах үлэтин арыйар тосхоллоох түөрт түһүмэхтээх уонна уос аһар олук, туомтуу баайыы киириилээх түмүктээҕин, уу сахалыы тылынан суруллубут, ааҕарга өйдөнүмтүө, олус кэрэхсэбиллээҕин билиһиннэрдэ. Үтүө күн түһүлгэтигэр СӨ Бырабыыталыстыбатын бэрэссэдээтэлин солбуйааччыта Сергей Васильевич Местников, СӨ култуураҕа уонна духуобунай сайдыыга миниистирэ Афанасий Иванович Ноев, Сунтаар улууһун баһылык бастакы солбуйааччыта Павел Анатольевич Григорьев, бэйиэт, норуодунай суруйааччы, прозаик уонна суруналыыс, Cаха Өрөспүүбүлүкэтин Суруйааччыларын сойууһун уонна суруйааччылар Норуоттар икки ардыларынааҕы сообществоларын чилиэнэ, Россия Суруналыыстарын сойууһун чилиэнэ. Билигин «Саха» НКИХ эрэдээктэрэ уонна ыытааччыта СӨ Култууратын үтүөлээх үлэһитэ Наталья Михалева-Сайа, филология магистра «Возраждения Саха» кинигэ кыһатын эрэдээктэрэ, элбэх кинигэҕэ үлэлэспит биир дойдулаахпыт Анетта Андреевна Егорова балта Анивера Андреевна Егорова, Аҕатын нэһилиэстибэтин үйэтитиигэ РНА СО ССНК рукописнай киинигэр аҕатын тылыттан суруллубут айымньылары үөрэтэн “Сарсын, сарсын сарсыарда” кинигэ тахсыытыгар үлэлэспитэ ЗверевТөгүл Сергеевич, РФ үөрэҕириитин Бочуоттаах үлэһитэ, СӨ үөрэҕириитин туйгуна Мария Васильевна Кондратьева бэйэлэрин истиҥ эҕэрдэлэрин эттилэр уонна бэйэтин истиҥ ырыатынан киэргэттэ Галина Кривошапко аатынан Судаарыстыбаннай филармония артыыһа Петр Попов.
Маны таһынан Суруйааччылар Гуринов Афанасий Гаврильевич — Арчылан, СӨ суруйааччыларын сойууһун чилиэнэ, «Күрүлгэн» сурунаалы таһаарааччы, СӨ «Гражданскай килбиэн» бэлиэтин туһааннааҕа, поэт уонна прозаик. Егорова Надежда Парфеньевна — Намылы, СӨ култууратын, СӨ бэчээтин туйгуна, СӨ үтүөлээх суруналыыһа, «Көдьүүстээх суруйуу иһин» Арассыыйа Суруналыыстарын сойууһун бириэмийэтин хаһаайката, Арассыыйа Суруналыыстарын, СӨ Суруйааччыларын сойуустарын чилиэнэ, Нельбисова Галина Васильевна, СӨ култууратын үтүөлээх үлэһитэ, РФ суруналыыстарын уонна суруйааччыларын Сойууһун чилиэнэ, Элгээйи нэһилиэгин бочуоттаах олохтооҕо, Николаев Иван Николаевич — Уххан, Суруйааччы, суруналыыс, поэт, публицист, Валерий Никифоров — Суор Уола, суруйааччы, Алексеева Наталья Николаевна, СӨ култууратын туйгуна, СӨ култууратын үтүөлээх үлэһитэ, СӨ «Гражданскай килбиэн» бэлиэтин туһааннааҕа сүрэхтэнии ыалдьыттарынан буоллулар.
Улуу тойуксут, оһуокайдьыт, төрүт култуура төлкөлөөх түөрэҕин түһэрбит Сергей Афанасьевич албан аатыгар сүһүөхтээх бэйэбит сүгүрүйэбит, хоолдьуктаах бэйэбит хоҥкуйабыт. Улуу тойуксут, талааннаах тэрийээччи С.А.Зверев-Кыыл Уола өбүгэлэриттэн утумнаабыт тоҕус оһуордаах добун түһүлгэтэ айыыларга аман алгыс буолан, саха омугу сомоҕолоотун, айымньылаах үлэҕэ көҕүлээтин, албан аата-суола аҕыс үйэҕэ аатырдын, тоҕус үйэҕэ туругура турдун!
Л.А.Попов аатынан Сунтаардааҕы киин бибилэтиэкэ ааҕааччыны кытта үлэлиир салаа.
