Төрүт дойдубут – Тэҥкэ
Ханнык баҕарар норуот бэйэтин тылын, историятын, култууратын, сиэрин-туомун уонна төрөөбүт ийэ сирин-дойдутун үөрэтэр буоллаҕына киэҥ билиилээх, инникигэ сайдыылаах буолар.
Алтынньы 18 күнүгэр С.А. Зверев-Кыыл Уолун аатынан норуот айымньытын киинигэр “Төрүт дойдубут – Тэҥкэ” диэн Тэҥкэ ытык сирин, дьонун-сэргэтин туһунан кэпсиир кэрэхсэбиллээх кинигэ күн сирин көрбүтүн сүрэхтэниитэ буолла. Тэрээһини иилээн-саҕалаан ыыттылар Л. А. Попов аатынан киин бибилэтиэкэ бибилэтиэкэрдэрэ Мария Алексеева уонна Саргылана Генерова. Саҥа кинигэ ис тутулун кэлбит ыалдьыттарга сиһилии билиһиннэрдэ библиограф Мария Иванова.
Норуот тыына, олох олорор күүһэ, үтүөҕэ сырдыкка тардыһыыта төрөөбүт сирин-уотун, төрдүн- ууһун, дьонун-сэргэтин билиититтэн саҕаланар. Онон үөскүүр-төрүүр ыччакка нэһилиэк быдан былыргытын салгыы үөрэттиннэр, дьоннорун, төрүттэрин биллиннэр диэн баай архыып докумуоннарыгар олоҕурбут кинигэ тахсыбыт. Бу кинигэҕэ Тэҥкэ нэһилиэгин дьоно-сэргэтэ төрөөбүт дойдуларын туһунан ис сүрэхтэн суруйуулара кэнэҕэски кэнчээри ыччакка, Тэҥкэттэн төрүттээх дьоммутугар-сэргэбитигэр сүдү бэлэх буолла.
Бу дьоһуннаах кинигэ Дьокуускай куоракка Гагарин аатынан СӨ типографиятыгар 250 экземплярынан бэчээттэнэн таҕыста. Кинигэни хомуйан оҥордулар Валерий Дмитриевич Федоров, Виталий Григорьевич Николаев. Редакционнай сүбэҕэ үлэлээтилэр Светлана Николаевна Игнатьева, Григорий Иванович Игнатьев, Борис Егорович Герасимов, Валентина Дмитриевна Яковлева, Валентина Егоровна Степанова. Редактордаатылар Ольга Владимировна Захарова, Мария Михайловна Алексеева. Дизайнын, компьютернай версткатын Алквиад Иннокентьевич Алексеев оҥордо. Кинигэ элбэх хаартыскалардаах, докумуоннардаах, бу барыта Тэҥкэ нэһилиэгин олохтоохторун, бу сиртэн төрүттээх дьон тус архыыптарыттан ылылынна. Уонна бу кэлиҥҥэ сылларга саҥа киирбит QR кодтардаах. QR кодтарын Валерий Дмитриевич Федоров оҥордо.
Дьоро күн түһүлгэтэ ыраах Корея сириттэн быһа эфиринэн тахсыбыт Тэҥкэ нэһилиэгин баһылыга Светлана Николаевна Игнатьева эҕэрдэ тылынан саҕаланна. Онтон Тэҥкэ нэһилиэгин бастакы баһылыга Григорий Иванович Игнатьев эмиэ куйаар ситимин нөҥүө бэйэтин баҕа санаатын эттэ. Ол кэннэ эҕэрдэ тылларын Сунтаар улууһун аҕа баһылыгын социальнай уонна имиджевай политикаҕа солбуйааччы Гаврил Михайлович Еремеев, Сунтаар улууһун култууратын уонна айылгытын салалтатын сүрүннүүр исписэлииһэ Геннадий Владимирович Иванов, Сунтаар улууһун үөрэҕириитин салалтатын салайааччытын солбуйааччы Владимир Владимирович Уаров, Сунтаар улууһун кииннэммит бибилэтиэкэлэрин ситимин директорын солбуйааччыта Анатолий Аркадьевич Львов эттилэр. Бэйэлэрин ахтыыларын, санааларын, кинигэ хайдах таҥыллан, хомуллан күн сирин көрбүтүн туһунан Борис Егорович Герасимов, Ольга Владимировна Захарова, Анна Дмитриевна Константинова, Люция Прокопьевна Иванова куйаар ситиминэн Тэҥкэ нэһилиэгин бочуоттаах олохтооҕо Петр Константинович Яковлев уонна кинигэ күн сирин көрөрүгэр тэҥҥэ үлэлэспит дьон өр сыллар усталарыгар сыралаһан кинигэ матырыйаалын хомуйууга, ахтыы суруйан хайдах үлэлээбиттэрин ахтан-санаан аастылар, бэйэлэрин көрүүлэрин, баҕа санааларын эттилэр. Ону таһынан, кинигэ сүрэхтэниитин музыкальнай эҕэрдэлэринэн Сунтаардааҕы оҕо ускуустубатын оскуолатын үлэһиттэрэ Ньургун Данилов уонна Анатолий Пахомов киэргэттилэр.
Түмүккэ Тэҥкэ нэһилиэгин баһылыгын солбуйааччыта Елена Радомировна Тихонова кинигэ тахсарыгар уонна сүрэхтэнэригэр үлэлэспит дьоҥҥо махтал тыллардаах сэмэй бэлэхтэрин туттартаата.
Олох дохсуннук иннин диэки баран иһэр, туох барыта умнуллар, история буолан хаалар. Тэҥкэ нэһилиэгин сайдарыгар олук уурбут дьоммут умнуллубакка ааттарын үйэтитэн, кэлэр көлүөнэ ыччат уруккуну-хойуккуну ырытан билэллэригэр бу кинигэ төһүү күүс буолуоҕа диэн эрэлбит улахан.
«Төрүт дойдубут – Тэҥкэ” саҥа кинигэ бар дьоммутугар күндү бэлэх буоллун!
Суруйда Л.А. Попов аатынан Сунтаардааҕы киин библиотека ааҕар саалатын кылаабынай бибилэтиэкэрэ Саргылана Генерова.
