Олоҥхо–уус тыл улуу айымньыта, уран өй сүдү көрүҥэ. Өрөспүүбүлүкэбитигэр сыллата Олоҥхо күнүгэр аналлаах декаданы ыытыы үтүө үгэскэ кубулуйан, киэҥ далааһыннанна. Саха Өрөспүүбүлүкэтин Олоҥхо ассоциацията, Саха Өрөспүүбүлүкэтин Национальнай бибилэтиэкэтэ, М.К. Аммосов аатынан Хотугулуу-Илиҥҥи федеральнай университет, Олоҥхо научнай чинчийэр института, Хотугулуу-Илиҥҥи норуоттар тылларын уонна култуураларын института «Олоҥхо дьыктаана” диэн аахсыйаны сыл аайы биллэрэр. Аахсыйа сыала сахалыы таба суруйуу үөрүйэҕин сайыннарыы уонна олоҥхо баай тылынан-өһүнэн билиини-көрүүнү кэҥэтии буолар.
Сэтинньи 25-30 күннэригэр Сунтаардааҕы кииннэммит бибилэтиэкэ ситимэ улуус үрдүнэн 21 былааһакка тэрийдэ. Саамай элбэх кыттааччы Сунтаарга (42 киһи), Түбэй-Дьаархаҥҥа (19 киһи) уонна Кириэстээххэ (17 киһи) бэлиэтэннилэр. Улуус үрдүнэн барыта 236 киһи кыттыыны ылла, олортон дьыктааны 55 киһи туйгуннук суруйда. Күүкэй нэһилиэгин Ытык олохтооҕо, өр сылларга Күүкэй кулуубун директорынан үлэлээбит, култуура бэтэрээнэ, «Иэйии абылаҥа», «Ньургуһун» литературнай түмсүү кыттыылааҕа 80 саастаах Николай Дмитриевич Алексеев кыттыыны ылан барыбытыгар холобур буолла.
Аахсыйаҕа кыттыбыт дьоҥҥо туоһу сурук бэриллиннэ, биир да алҕаһа суох суруйбуттар анал суруктарынан наҕараадаланнылар.
Оскуола оҕолоро ахсынньы 5 күнүгэр дылы СӨ Национальнай бибилэтиэкэтин сайтыгар https://olonkhotest.nlrs.ru/ киирэн бэйэлэрин тургутан көрүөхтэрин сөп. Хас биирдии кыттыбыт үөрэнээччигэ сэртипикээт бэриллэрин санатабыт.
Методическай-информационнай салаа үлэһитэ Алена Портнягина
