Муус устар 16 күнүгэр, РЭС хонтуоратын аактабай саалатыгар ураты суоллаах-иистээх, Валерий Семенов «Сунтаар сылаас кутаата» диэн бастакы кинигэтин сүрэхтэниитин биир идэлээхтэригэр билиһиннэрдэ, бар дьонугар бэлэх уунна. Ол курдук, «Якутскэнерго» хампаанньа Арҕааҥҥы электрическэй ситимнэригэр киирсэр Сунтаардааҕы уот ситимин тэрилтэтин туһунан кэпсиир матырыйааллар, өр сылларга үлэлээн ааспыт бэтэрээн үлэһиттэр, билигин үлэлии сылдьар энергетиктэр ахтыылара, хаартыскалара, Саха Өрөспүүбүлүкэтин Национальнай архыыбын пуондатыттан докумуоннар куоппуйалара, улуус кииннэммит библиотекатын кинигэлэриттэн ыстатыйалар, араас сыллардааҕы улуус хаһыатын матырыйааллара — киирдилэр.
Көрсүһүү саҕаланыытыгар РЭС үлэтин-хамнаһын туһунан киинэ көрдөрүлүннэ. Салгыы кинигэ тахсарыгар сүҥкэн кылаатын киллэрэн, сыратын-сылбатын биэрэн сүүрэн-көтөн сүрүннээбит Валерий Семенов кинигэ ис тутулун сырдатта ол курдук, 1940 сыллаахха аан бастаан уот Кэппэндээйи нэһилиэгэр киирбитин уонна да атын интэриэһинэй чахчылары ахтан-санаан ааста. Санатан этэр буоллахха, быйыл Сунтаар улууһугар уот ситимэ тардыллыбыта 85 сылын туолар. Үтүө күн түһүлгэтигэр бэйэлэрин истиҥ эҕэрдэлэрин эттилэр Сунтаар улууһун баһылыга Анатолий Григорьев, Сунтаар улууһун култууратын уонна айылгытын салалтатын координационнай салаатын сэбиэдиссэйэ Анна Трифонова, Сунтаар нэһилиэгин баһылыгын солбуйааччыта Семен Николаев. Маны сэргэ “Якутскэнерго” публичнай акционернай уопсастыба Арҕааҥҥы электрическэй ситимнэрин Сунтаардааҕы оройуонун начальнига Николай Игнатьев, Сунтаардааҕы РЭС бэтэрээн үлэһитэ, өр сылларга Сунтаардааҕы уот ситимин салайааччытынан үлэлээбит Юрий Григорьев уонна ыҥырыллан кэлбит бэтэрээн үлэһиттэр саҥа кинигэ күн сирин көрбүтүнэн эҕэрдэ тылларын эттилэр. Түмүккэ Валерий Ильич ыҥырыылаах ыалдьыттарыгар саҥа кинигэтин бэлэх уунан дьонун-сэргэтин үөртэ. Салҕыы ааптар толору астаах сандалы остуолугар ыҥыртаан үөрүүтүн үллэстэн сүргэтэ көтөҕүлүннэ.
Кинигэ сүрэхтэниитэ олус истиҥник ааста, бу кинигэ умнуллубат суолу хаалларыаҕа диэн эрэнэбит.
Суруйда Л.А.Попов аатынан киин бибилэтиэкэ ааҕааччыны кытта үлэлиир
салаа сүрүннүүр бибилэтиэкэрэ Саргылана Генерова
