ССРС суруйааччыларын сойууһун чилиэнэ, РСФСР култууратын үтүөлээх үлэһитэ, Саха АССР искусстволарын үтүөлээх диэйэтэлэ, Үлэ Кыһыл Знамя уордьанын икки төгүллээх туһааннааҕа, Сунтаар улууһун Бочуоттаах олохтооҕо, норуот ырыаһыта Кыыл Уола Сэргэй Сибиэрэп төрөөбүтэ 125 сылыгар анаммыт Леонид Андреевич Попов аатынан «СУНТААР МИИГИН ЫҤЫРАР-2025» IX-с ырыа-хоһоон түһүлгэтэ Сунтаар улууһун Түбэй Дьаархан нэһилиэгэр Оһуокай ыһыаҕын чэрчитинэн бэс ыйын 25 күнүгэр, улуу киһибит Сэргэй Сибиэрэп төрөөбүт күнүгэр буолан ааста.
Сарсыардаттан пааркаҕа дьон-сэргэ тоҕуоруһа мустан, ыраахтан-чугастан кэлбит ыалдьыттары арчылаан көрсүү, ыһыах аһыллыытын сиэрин-туомун кэнниттэн, ырыа-хоһоон түһүлгэтэ (литературнай пикник) төрүттэннэ. Ил Түмэн Бэрэссэдээтэлин бастакы солбуйааччыта Александр Жирков, биир дойдулаахпыт, филологическай билим доктара, учуонай, Сунтаар улууһун Бочуоттаах олохтооҕо Василий Илларионов, Сибиэрэп оҕолоро Төгүл, Күөгэйээнэ Зверевтар, кийиитэ худуоһунньук, норуот маастара, СӨ култууратын үтүөлээх үлэһитэ Анна Зверева, СӨ суруйааччылара Надежда Егорова-Намылы, Ирина Харайданова-Сэгэлдьийэ Чээлэй, Николай Егоров-Аҕырытта Ньукулай, Валентина Дьячковская-Хара Көмүс, Зинаида Федотова-Дьол Кыыма, Сунтаар улууһун култууратын салайааччыта Саргылана Омукова ыалдьыттаатылар, сүдү киһибитин ахтан-санаан тыл эттилэр, санааларын үллэһиннилэр. Үөрэҕирии эйгэтин бэтэрээнэ, СӨ Гражданскай килбиэн бэлиэ туһааннааҕа, Сунтаар улууһун, Тойбохой нэһилиэгин бочуоттаах олохтооҕо Клара Тихонова Кыыл Уола Сэргэй Сибиэрэби үйэтитиигэ ыытар үлэтин куйаар ситиминэн кэпсээтэ.
«Номох буолан умнуллубат–норуот тыыннаах тыла!» анабыл хоһоону айыыга өрөспүүбүлүкэтээҕи кэтэхтэн күрэс дьүүллүүр сүбэтин түсчүтэ Саха норуотун суруйааччыта Наталья Михалева-Сайа куйаар ситиминэн ыыппыт итии-истиҥ эҕэрдэтин, кыттааччылар хоһоонноругар санаатын үллэстибитин түһүлгэ кыттыылаахтара олус сэргээн иһийэн олорон иһиттилэр. Салҕыы ааптардар уонна бибилэтиэкэ кыргыттара күрэс кыайыылаахтарын хоһооннорун ааҕан билиһиннэрдилэр. Кутана нэһилиэгиттэн суруйааччы, норуот маастара Валентина Дьячковская-Хара Көмүс өрүү да буоларын курдук саха киһитэ сиэринэн илии тутуурдаах кэлэн кэһиилэрин туттартаан ыалдьыттары үөртэ.
Тэрээһин кэмигэр «Тыл сүмэтэ»–көҥүл түһүлгэҕэ улууспут нэһилиэктэриттэн олохтоох ааптардар, ыаллыы сытар Ньурбаттан “Ньурба уоттара” литературнай түмсүүттэн кэлэн айар-тутар үлэлэрин билиһиннэрдилэр, хоһооннорун аахтылар, «Кэмчи кэрчиктэр» тута хоһуйууга күрэс, “Аар тайҕа ырыаһыта” кинигэ быыстапката, автограф-сессия, кинигэ атыыта, хаартыскаҕа түһүү тэрилиннилэр. Тэрээһин үөрүүлээх чааһыгар кыайыылаахтарга наҕараадалар туттарылыннылар, үгэс быһыытынан Леонид Попов суруйбут «Сунтаар миигин ыҥырар» ырыатынан түмүктэннэ.
Саргылана Спиридонова, Алена Портнягина,
информационнай-методическай салаа үлэһиттэрэ
