Бэйиэт Альберт Бүлүүйүскэй төрөөбүтэ 80 сылыгар аналлаах VII-с ырыа-хоһоон түһүлгэтэ
Балаҕан ыйын 15 күнүгэр Кутана нэһилиэгин «Алгыс” култуура киинигэр бэйиэт Альберт Семенович Егоров – Бүлүүйүскэй төрөөбүтэ 80 сылыгар анаммыт «Сунтаар миигин ыҥырар-2023” VII ырыа-хоһоон түһүлгэтэ олус көхтөөхтүк буолан ааста. Онно улууспут нэһилиэктэриттэн, Ньурба улууһуттан, Дьокуускай куораттан айар талааннаахтар кэлэн, барыта 116 киһи кыттыыны ыллылар. Дьоро түгэҥҥэ күндү ыалдьыттарынан Дьокуускайтан Саха сирин суруйааччыларын, Арассыыйа суруналыыстарын Сойууһун чилиэннэрэ Валериан Николаев, Афанасий Гуринов-Арчылан, суруналыыс, успуорт комментатора Александр Васильев-Көрдүгэн, композитор, мелодист Алексей Калининскай-Луҥха, СӨ Национальнай бибилэтиэкэтин докумуоннары кытта үлэҕэ пуондаҕа салаатын сүрүннүүр бибилэтиэкэрэ Мария Сивцева уо.д.а. буоллулар.
Тэрээһин үөрүүлээх арыллыытыгар бэйиэт сырдык аатын үйэтитиигэ киэҥ далааһыннаах үлэни ыыппыт Трофим Семенович Кириллин аатынан Кутана сельскэй модельнай бибилэтиэкэтин кылаабынай бибилэтиэкэригэр Нюргуяна Трофимовна Егороваҕа Сунтаар улууһун аҕа баһылыгын социальнай уонна имиджевай политикатын солбуйааччыта Г.М.Еремеев СӨ култууратын туйгуна бэлиэни туттарда.
Ырыа-хоһоон түһүлгэтигэр «Кэҕэ кулгааҕа» саҥа кинигэ сүрэхтэннэ. Кинигэ ааптара бэйиэт Альберт Бүлүүйүскэйи кытта алтыспыт ыкса доҕоро, тыа сирин тутуутугар 40-тан тахса сыл үлэлээбит, СӨ бочуоттаах тутааччыта, Норуоттар икки ардыларынааҕы, Арассыыйа Суруйааччыларын, Саха сирин Суруйааччыларын сойуустарын, “Ньургуһун” литературнай түмсүү чилиэнэ, хас да кинигэ ааптара Николай Васильевич Егоров-Аҕырытта Ньукулай.
“Кэҕэ Кулгааҕа” саҥа кинигэ Дьокуускай куоракка аҕыйах хонуктааҕыта 140 ахсаанынан бэчээттэнэн таҕыста. Бу күҥҥэ анаан-минээн Альберт Бүлүүйүскэй 80 сылын көрсөр күнүгэр сүрэхтэммитэ икки бүк үөрүүлээх. Саҥа кинигэҕэ бэйиэт Альберт Бүлүүйүскэйгэ анабыл хоһоонноро, бэйиэт хоһоонугар ырыалара, суруктара, ахтыылара уонна сэдэх хаартыскалар бэчээттэнэн таҕыстылар.
Саҥа кинигэ ис тутулун сырдатта РФ Суруналыыстарын сойууһун чилиэнэ, Саха Өрөспүүбүлүкэтин култууратын үтүөлээх үлэһитэ, Вячеслав Степанов аатынан бириэмийэ лауреата, Саха Өрөспүүбүлүкэтин суруналыыстарын «Көмүс бөрүө» бириэмийэтин лауреата, «Сахаада-спорт» ассоциация лауреата, Сыл бастыҥ спортивнай комментатора, Сунтаар улууһун Күндэйэ нэһилиэгин ытык киһитэ Александр Васильевич Васильев-Көрдүгэн.
Үтүө күн түһүлгэтигэр Аҕырытта Ньукулайга бэйэлэрин эҕэрдэлэрин уонна сэмэй бэлэхтэрин туттардылар Сунтаар улууһун аҕа баһылыгын социальнай уонна имиджевай политика солбуйааччыта Г.М.Еремеев, Сунтаар улууһун култууратын уонна айылгытын салалтатын салайааччыта С.Д.Омукова, Сунтаардааҕы кииннэммит библиотечнай ситим салайаачыта И.И. Жиркова, Сунтаар улууһун “Ньургуһун” литературнай түмсүү салайааччыта Р.Е.Сидорова-Ымыычаана, Күндэйэ нэһилиэгин бибилэтиэкэрэ М.А.Андреева, Кириэстээх нэһилиэгин «Тымтык» литературнай түмсүүтэ, «Ньургуһун» түмсүү төрүттэниэҕиттэн бииргэ сылдьар чугас доҕоро Трофим Акимов – Тирэҕэ Тэрэппиин уонна аймах-билэ дьонноро. Бу күн Аҕырытта Ньукулай үөрүүтүн тэҥҥэ үллэстибит ыалдьыттар саҥа кинигэни бэлэх тутан дуоһуйа астыннылар, түмүккэ бары үйэлээх хаартыскаҕа хатаннылар.
“Ньургуһун хоһуйар түһүлгэтэ” кэтэхтэн күрэскэ барыта 17 кыттааччыттан 20 үлэ киирдэ. Быйылгы ыытыллыбыт күрэс тиэмэтэ-Альберт Бүлүүйүскэйгэ анабыл хоһоон.
Дьүүллүүр сүбэ састаабыгар үлэлээтилэр: бэйиэт, прозаик, саха тылын уонна литэрэтиирэтин идэлээҕэ, суруналыыһа, Суруйааччылар сойуустарын норуоттар ыккардыларынааҕы түмсүүтүн, Саха Өрөспүүбүлүкэтин Суруйааччыларын уонна РФ Суруналыыстарын сойуустарын чилиэнэ Афанасий Гуринов-Арчылан, Сунтаар улууһун култууратын уонна айылгытын салалтатын салайааччыта Саргылана Омукова, Сунтаардааҕы кииннэммит библиотечнай ситим салайааччыта Изабелла Жиркова киирбит үлэлэри көрөн, сыаналаан, биир санаанан Варвара Максимова-Тырымнаайы үлэтин хайҕаан кыайыылаах үрдүк аатын иҥэрдилэр уонна Сунтаар улууһун култуурата «ОФСЕТ» типографияҕа кинигэтин бэчээттэтэригэр 50.000 солк.сууммалаах туоһу сурук туттарда.
«Сүрэхтэн үөскээн тахсыбыт истиҥ хоһооннор» көҥүл ааҕыы түһүлгэтэ биир дойдулаахпыт бэйиэт Альберт Бүлүүйүскэй төрөөбүтэ 80 сылыгар ананна. Түһүлгэҕэ айар суруйар дьоҕурдаах дьоммут мустан субуллар хоһооннорун аахтылар,ырыа-тойук дьиэрэйдэ.
Түһүлгэни улуустааҕы” Ньургуһун” түмсүү салайааччыта Розалия Сидорова — Ымыычаана хоһоонунан арыйда. Салҕыы айар куттаахтар тыл сүмэтин холбуйан, иэйии ситимин тиһэн, ырыа ылламын айан бэйэлэрин айымньыларын мустубут ыалдьыттарга, кыттааччыларга ааҕан бэлэх ууннулар. Бу түһүлгэҕэ барыта 26 киһи кыттыыны ылла. Ол иһигэр 5 оскуола үөрэнээччилэрэ. Хоһоонньуттар көҥүл түһүлгэлэригэр айар куттаахтар көхтөөхтүк кытыннылар.
«Кэмчи кэрчиктэр» – бэриллибит тиэмэнэн кылгас кээмэйдээх тута хоһуйууга күрэскэ барыта 23 хоһоон киирдэ. Быйылгы тиэмэни Николай Егоров – Аҕырытта иһитиннэрдэ уонна саҥа таһаарбыт кинигэтинэн аатынан “Кэҕэ кулгааҕа” диэн буолла. Дьүүллүүр сүбэ быһаарыытынан кыайыылааҕынан Түбэй оскуолатын 11-с кылааһын үөрэнээччитэ Вилена Илларионова буолла уонна Леонид Попов аатынан киин бибилэтиэкэ туруорбут 5 тыһыынча солкуобайынан наҕараадаланна.
«Сүрэх кэриэтэ чугас буолуом» автограф-сессияҕа айар куттаах дьон кинигэлэрин атыыта тэрилиннэ. Ааптардар кинигэлэригэр баҕа санааларын суруйан бар дьоҥҥо бэлэх ууннулар.
Ону таһынан бэйиэккэ аналлаах “Альберт Бүлүүйүскэй – кэлэр кэм айанньыта” кинигэ быыстапката: бэйиэт айымньылара, доҕотторун суруйааччылары кытта суруйсубут суруктара, ахтыылара, уруһуйдара, төрүччүтэ дьон-сэргэ сэҥээриитин ылла. Киниэхэ аналлаах фотозонаҕа ыалдьыттар хаартыскаҕа түһэн бу күнү үйэтиттилэр.
«Мин ыллыахпын баҕарабын хаһан да өлбөт ырыанан» – кэнсиэр, наҕараадалааһын, тэрээһини үөрүүлээхтик түмүктээһин буолла. Манна Дьокуускайтан, Элгээйиттэн, Кутанаттан, Сунтаартан, Күндэйэттэн ыалдьыттар ылбаҕай ырыаларынан, тойуктарынан киэргэттилэр.
Тэрийээччилэр ааттарыттан Кутана нэһилиэгин аҕа баһылыгар Николай Давыдовка, ыалдьытымсах олохтоохторго улахан махталбытын тириэрдэбит. Көрсүөххэ диэри!
Мария Алексеева, Марфа Спирова, Алена Портнягина Сунтаардааҕы кииннэммит библиотечнай ситим үлэһиттэрэ
