«СУНТААР МИИГИН ЫҤЫРАР» саха норуодунай бэйиэтэ Леонид Андреевич Попов аатынан VIII улуустааҕы ырыа-хоһоон түһүлгэтин чэрчитинэн «Кэмчи кэрчиктэр» диэн бэриллибит тиэмэнэн кылгас кээмэйдээх тута хоһуйуу күрэһигэр барыта 20 киһи кытынна. Дьүүллүүр сүбэ биэрбит 3 хамбыарга угуллубут тирэх тылларыттан кырачаан Дьулус талан ылбытын дьүүллүүр сүбэ түсчүтэ Ульяна Дмитриевна Попова иһитиннэрдэ. Быйылгы тирэх тыл «Дьылҕа» диэн буолла. Кыттааччылар 15 мүнүүтэ иһигэр суруйбут 4 строкалаах хоһоонноруттан дьүүллүүр сүбэ быһаарыытынан кыайыылааҕынан ыалдьыппыт — бэйиэт, публицист, Арассыыйа суруналыыстарын сойууһун, СӨ мелодистарын сойууһун, норуоттар икки ардыларынааҕы суруйааччылар уонна СӨ суруйааччыларын сойуустарын чилиэнэ, экономическай наука кандидата Михаил Санников-Уол Сарсын буолла уонна 5000 солкуобайынан наҕараадаланна.
