«Сунтаар миигин ыҥырар» саха народнай бэйиэтэ Л.А.Попов аатынан IX төгүлүн улуустааҕы ырыа -хоһоон түһүлгэтин чэрчитинэн ыытыллыбыт “Ньургуһун хоһуйар түһүлгэтэ” кэтэхтэн күрэскэ барыта 12 кыттааччыттан 24 хоһоон киирдэ. Быйылгы күрэс тиэмэтэ -Улуу Кыайыы 80 сылыгар аналлаах “Кыайыы” хоһоонноро.
Дьүүллүүр сүбэ састаабыгар үлэлээтилэр: бэрэссэдээтэл-Прозаик, публицист, тылбаасчыт, СӨ суруйааччыларын сойууһун чилиэнэ, Дойдулар икки ардыларынааҕы суруйааччылар сойуустарын чилиэнэ өрөспүүбүлүкэ уус-уран оҥоһуктарын маастара Валентина Дьячковская – Хара Көмүс, публицист, Арассыыйа уонна СӨ суруналыыстарын сойууһун чилиэнэ, норуоттар икки ардыларынааҕы суруйааччыларын уонна СӨ суруйааччыларын сойуустарын чилиэнэ, суруналыыстар сойуустарын бириэмийэтин лауреата Надежда Егорова-Намылы, СӨ суруйааччыларын сойууһун чилиэнэ, Россия суруналыыстарын чилиэнэ, үрдүк категориялаах учуутал Ирина Харайданова-Сэгэлдьийэ Чээлэй киирбит үлэлэри көрөн сыаналаатылар.
Бу күрэскэ киирбит хоһооннор бары да үчүгэйдэр, ол эрэн ордук Күүкэйтэн Екатерина Львова-Долгууна, Данил Львов -Айылҕа Уола, Элгээйиттэн Изабелла Макарова-Толоон Туорааҕа, Кэппэндээйиттэн Николай Герасимов-Дьээбэ Тойон, Арыылаах нэһилиэгиттэн Вениамин Егоров-Айаан Чакыр, Кириэстээхтэн Александр Амбросьев -Сайылык Уола уонна Лидия Данилова-Илгийэ хоһоонноро хайҕанна. Ол эрэн ханнык баҕарар күрэскэ «Бэртэн бэрт» баар буолан биир санаанан салайтаран Кириэстээх нэһилиэгин, «Тымтык» литературнай түмсүү чилиэнэ Лидия Данилова-Илгийэ үлэтин талан Кыайыылаах үрдүк аатын иҥэрдилэр. Уонна үгэскэ кубулуйбут Сунтаар улууһун култууратын саламтатын анал бирииһин «ОФСЕТ» типографияҕа кинигэтин бэчээттэтэригэр 50.000 солкуобай суумалаах туоһу сурук туттардылар.
ҮС УОЛУН СУТЭРБИТ ИЙЭКЭЭН
Үс уолун сүтэрбит ийэкээн
Сүрэҕэ ньүөлүйэн ыалдьара,
Алааска аҕалар аартыгы
Күн ахсын кэтэһэн маныыра…
Улахан уолчааныҥ эрэлиҥ,
Оҕунна геройдуу-диэн сурук
Кэлбитэ кутурҕан аргыстаах-
Хараҕын уутунан сууннаран…
Орто уол дьылҕата биллибэт-
Олох да сурах иһиллибэт…
Хайа сир халлаанын анныгар
Хараҕын симээхтээн хаалбытай?…
Кырата-сүрэҕин чопчута
Кыргыһыы уотуттан орпотох,
Кыайыыны ситиһэн өрөйөн,
Кэлбэтэх баттыкка өйөнөн…
Күн ийэ сүрэҕэ уоскуйбат,
Кэм кэрдии аһыыны суурайбат…
Ол сэрии аҕалбыт иэдээнэ
Умнуллуон хайдах да сатаммат…
Сир ийэ иэнигэр хаһан да
Сэриинэн силлиэрэн турабын,
Бу күннээх чээлэй күөх халлааны
Боруорбут ыар былыт саппатын.
Лидия Данилова-Илгийэ, Кириэстээх.
Л.А.Попов аатынан Сунтаардааҕы
киин бибилэтиэкэ ааҕар саалата
