Бүгүн, кулун тутар 12 күнүгэр Сунтаар киин бибилэтиэкэтигэр «Чолбон» сурунаал эрэдээксийэтин үлэһиттэрин кытта истиҥ көрсүһүү буолан ааста.
Биһиги ыалдьыттарбыт “Чолбон” бас эрэдээктэрэ, Саха сирин суруйааччыларын сойууһун бэрэссэдээтэлэ, бэйиэт, публицист, кыраайы үөрэтээччи Гаврил Гаврильевич Андросов, «Чолбон» сурунаал эппиэттиир сэкирэтээрэ, СӨ культуратын туйгуна, суруналыыс Туйаара Степановна Павлова уонна сурунаал эрэдээксийэтин сүбэтин чилиэнэ, Саха Өрөспүүбүлүкэтин суруйааччыларын, Россия суруналыыстарын сойуустарын чилиэннэрэ, СӨ культуратын туйгуна, бэйиэт, прозаик, суруналыыс, биир дойдулаахпыт Ангелина Николаевна Шадринова-Суоһааны ааҕааччылары кытта төгүрүк остуол тула олорон ирэ-хоро кэпсэттилэр. Гаврил Гаврильевич этэринэн, Бүлүү бөлөх улуустарга саамай элбэх сурутааччылаах Сунтаар улууһа буолар диэн иһитиннэрдэ, маны сэргэ эрэдээксийэ үлэтин-хамнаһын, сонун бырайыактарын билиһиннэрдэ. Гаврил эдэр эрчимнээх салайааччы буоларын таһынан хоһоон суруйар дьоҕурдаах эбит, бэйэтин суруйбут хоһооннорун ыалдьыттарга ааҕан иһитиннэрдэ уонна бибилэтиэкэ кэлэктиибигэр “Сир түннүгэ” хоһооннорун хомуурунньугун бэлэх уунна.
Биир дойдулаахпыт, поэтессабыт Ангелина Шадринова-Суоһааны саҥарбытыгар, сахабыт тыла баайын, кэрэтин өссө төгүл итэҕэйдибит, ол курдук, кэрэ куолаһынан сааһылаан саҥарара киһини эрэ абылыырын иһиттибит. Ону таһынан, Алампа 1926 с. суруйбут хоһоонугар төрөөбүт тылбыт нуучча тылыгар баһыйтарыан сөптөөҕүн оччолорго бэлиэтээбитин сөхпүтүн ааҕан иһитиннэрдэ. Эдэр төрөппүттэргэ сүбэ-соргу курдук оҕоҕо нэдиэлэҕэ 1 айымньыны аахтарарга, остуоруйа кэпсииргэ сүбэлээтэ. Оччоҕуна оҕо даҕаны, төрөппүт даҕаны духовнай өттүнэн сайдыылаах буолуохтара диэн тоһоҕолоон эттэ.
Ааҕааччыларбыт Иван Чагдинскай “Чолбон” сурунаал эрэдээксийэтигэр “Сиргэ көмүллүбүт дьол” диэн кинигэтин бэлэх уунна. Бибилэтиэчинэй үлэ бэтэрээнэ Зинаида Иванова “Оскуола бибилэтиэкэрдэригэр оҕоҕо кинигэ аахтаран саҕалыахтаахтар, хас биирдии дэриэбинэҕэ оҕо ааҕыытын көҕүлүүр волонтердар баар буолуохтаахтар” диэн этиитин бары да сэҥээрэ иһиттибит. Көрсүһүүгэ кэлбит ыалдьыттар бары ирэ-хоро сэһэргэһэн, тапталлаах сурунаалларын эрэдээксийэтин дьонун кытта илэ кэпсэтэн астынан-дуоһуйан тарҕастылар
Ааҕааччыны кытта үлэлиир салаа
