От ыйын 1-2 күннэригэр «Айыы санаа айана» XVI өрөспүүбүлүкэтээҕи олоҥхо ыһыаҕа Өймөкөөн улууһун Томтор нэһилиэгэр буолан ааста. Сунтаар улууһун бибилэтиэкэтин үлэһиттэрэ Былатыан Ойуунускай «Дьулуруйар Ньургун Боотур» олоҥхотун уһун тыыннаах ааҕыы II өрөспүүбүлүкэтээҕи марафонугар кыттыыны ыллыбыт (Л.А. Попов аатынан Сунтаар киин бибилэтиэкэтин информационнай-коммуникационнай салаа библиограба Мария Иванова уонна ааҕар салаа бибилэтиэкэрэ Саргылана Генерова, Дьаархан, Күндэйэ нэһилиэктэрин бибилэтиэкэрдэрэ Анна Николаева, Мария Андреева).
Быйылгы уһун тыыннаах ааҕыы былырыыҥҥыттан уратыта диэн, “Ньургун Боотуру” 4 тылынан аахтылар: эбээннии, сахалыы, нууччалыы уонна ангылычаанныы. Холобура, саха атын ааттаппыт Дугуйдан Винокуров ийэтэ Ирина Христофоровна эбээннии аахта.
Олоҥхобут атын омук тылынан да ааҕылыннаҕына, тылын баайын сүтэрбэккэ, өссө элбэх киһини сомоҕолуур күүстээҕин эт кулгаахпытынан иһиттибит, уу харахпытынан көрдүбүт.
Маны сэргэ тоҕус улууһу туоруур уһун айаммыт устатыгар баар хатыламмат кэрэттэн кэрэ көстүүлэри үйэтитээччинэн бухгалтербыт Саргылана Петрова, салайааччыбыт директоры солбуйааччы Анатолий Львов, киэҥ нэлэмэн Сахабыт сирин араас туруктаах, Томпо, Өймөкөөн хайаларынан субуллар суолларыгар эрэллээх суоппардарынан Федор Жирков, Аркадий Прокопьев сырыттылар.
Суруйдулар Мария Иванова, Саргылана Генерова
