Балаҕан ыйын 21 күнүгэр – Сунтаар улууһун күнүгэр, кыраайы үөрэтээччи быһыытынан киэҥник биллэр А.Е. Яковлевка анаммыт «Ааппын суруй…» диэн бэрт интэриэһинэй мемориальнай быыстапка турда. Бу быыстапкаҕа Аркадий Егорович үлэтэ-хамнаһа, төрөөбүт дойдутун чинчийиилэрэ, улуус биллэр дьоннорун тустарынан элбэх историческай чахчылары үөрэппитэ көһүннэ уонна «Кыраайы үөрэтээччи, үйэлээҕи түстээччи, учуутал, архивист Яковлев Аркадий Егорович» кинигэ быыстапката сырдатылынна. Маны сэргэ, СӨ Национальнай библиотекатын электроннай каталогар киирбит А.Е. Яковлев суруйбут уонна кини туһунан ыстатыйалары билиһиннэрдилэр. Сунтаар киин бибилэтиэкэтин библиограба М.Х.Иванова хомуйан оҥорбут «Аркадий Егорович Яковлев» диэн өрөспүүбүлүкэ бэчээтигэр тахсыбыт ыстатыйаларын хомуурунньугун ийэтигэр Екатерина Николаевнаҕа бэлэх ууннубут. Быыстапкаттан Аркадий улуус историятын чиничийиитигэр хайдах курдук улахан, киэҥ үлэ ыыппытын дьон-сэргэ сөҕө-махтайа көрдүлэр. Кини кинигэлэрэ салгыы чинчийиигэ, үөрэтиигэ тирэх буолуохтара диэн бүк эрэллээхпит.
Быыстапканы Н.М. Родионова аатынан Сунтаардааҕы оҕо дьоҕурун сайыннарар киин үлэһиттэрэ көҕүлээн тэрийдилэр.
Ааҕааччыны кытта үлэлиир салаа сэбиэдиссэйэ
Федорова Е.С.
