СӨ физкультураҕа уонна спортка бэтэрээнэ, СӨ үөрэҕириитин туйгуна, “СӨ физкультура уонна спорт сайдыытыгар кылаатын иһин”, “СӨ бокса сайдыытыгар кылаатын иһин” бочуоттаах бэлиэлэр туһааннаахтара, Сунтаар улууһугар буокса сайдыытыгар улахан өҥөлөөх Игорь Дмитриевич Максимов көҕүлээһининэн, кини бэйэтэ уонна олохтон барбыт аҕа табаарыһа Василий Егорович Ананьев, биллэр спортивнай суруналыыс, фотограф, саха спордун летописеһа, 20 сыл устата 125 кинигэни таһаарбыт биир дойдулаахпыт Владислав Петрович Коротов хомуйбут матырыйаалларыгар олоҕуран бэлэмнэммит “Сунтаар буоксата – 65 сыл устата: (1959-2025)” кинигэ күн сирин көрөн, сунтаардарга дьоһуннаах бэлэх буолла.
Киэҥ ааҕааччыга урут биллибэтэх чахчылар, араас бэчээккэ тахсыбыт ыстатыйалар, ону тэҥэ Сунтаар буоксатыгар бэйэлэрин суолларын хаалларбыт биир дойдулаахтарбыт биографияларын, кинилэр ситиһиилэрин туһунан ааҕааччылр сэҥээрэн билсиэххит.
65 сыл диэн эттэххэ дөбөҥ. Толкуйдаан көрдөххө бу уһун сыллар усталарыгар сир үрдүгэр элбэҕи ситиспит киһи олоҕо буоллаҕа. Ити кэм устата буокса көрүҥэ, син эмиэ олох атын өрүттэрин тэҥэ, үүнүүнү уонна кэхтиини, кыайыылары уонна хотторуулары билэн кэллэ. Биир спорт көрүҥүн сайдыытын, туох баар түһүүтүн-тахсыытын сааһылаан-наардаан, ахтыылары, хаартыскалары, архыып матырыйаалларын көрдөөн, хомуйан оҥоруу, сурукка тиһии улахан үлэттэн, сыраттан-сылбаттан тахсарын өйдүүбүт, сыаналыыбыт.
Кинигэ тахсыытын үбүлээтэ уонна аан тылын суруйда Сунтаарбыт улууһун аҕа баһылыга Анатолий Григорьев.
Дьоро күн түһүлгэтигэр кыттыыны ыллылар Сунтаар улууһун аҕа баһылыга Григорьев Анатолий Васильевич, Дьокуускайтан СӨ норуотун хаһаайыстыбатын үтүөлээх үлэһитэ Миронов Александр Николаевич, РСФСР норуотун үөрэҕириитин туйгуна, СӨ физическэй култууратын уонна спордун үтүөлээх үлэһитэ Васильев Яков Афанасьевич, Сунтаар нэһилиэгин баһылыгын солбуйааччы Николаев Семен Александрович, Күндэйэ дьаһалтатын исписэлииһэ Егор Андреев уонна буокса бэтэрээннэрэ, тренердэр, спорду сэргээччилэр, А. Иванов аатынан олимпийскэй резервэ спортивнай оскуолатын үүнэн эрэр боксер оҕолоро.
Бу күн Игорь Дмитриевичка, Владислав Петровичка эҕэрдэ эҕэлгэтэ этилиннэ, дьон махталын биллэрдэ. Кинигэ сүрэхтэниитэ уопсай хаартыскаҕа хатаныыннан, оһуокайынан түмүктэннэ.
Суруйда ааҕар саала кылаабынай бибилэтиэкэрэ Мария Алексеева
