Сунтаардааҕы кииннэммит бибилэтиэкэ ситимигэр Олоҥхо декадатын чэрчитинэн “Сэтинньи 25 күнэ-Олоҥхо күнэ” кинигэ быыстапкалара, иһитиннэрии күннэрэ, библиотечнай уруоктар, бэсиэдэлэр тиһигин быспакка ыытылыннылар. Сунтаар улууһугар төрөөбүт төрүт тыл сылын чэрчитинэн, Сергей Афанасьевич Зверев–Кыыл Уола төрөөбүтэ 125 сылын көрсө Сунтаардааҕы кииннэммит бибилэтиэкэ ситимэ Сунтаар улууһун култууратын уонна айылгытын салалтатын, Сунтаар улууһун үөрэҕириитин салалтатын кытта биир улахан бырайыагы толкуйдаан Изабелла Ивановна Макарова-Толоон Туорааҕа “Таас Буурай Бухатыыр” олоҥхону дьиэ кэргэнинэн ааҕыы” кэтэхтэн күрэс биллэриллэн, нэһилиэктэргэ дьиэ кэргэттэри көрүү-истии бастакы түһүмэҕэ саҕаланна. Аан бастакыларынан нэһилиэктэртэн Түбэй, Кириэстээх, Бүлүүчээн, Бордоҥ саҕалаатылар.Бырайыак сүрүн сыала: дьиэ кэргэнинэн кинигэни ааҕыыны көҕүлээһин; олоҥхону саха норуотун героическай эпоһын быһыытынан билиһиннэрии, “Таас Буурай бухатыыр” олоҥхону ааҕан, төрөөбүт тылбыт бараммат баайын, сүмэтин иҥэринии, дьиэ кэргэҥҥэ сахалыы саҥарар эйгэни олохтооһун, саха тылын баайын, сүмэтин табатык туттарга, өйдүүргэ иитии, бастыҥ олоҥхону ааҕар дьиэ кэргэни киэҥ эйгэҕэ билиһиннэрии.
Саха Өрөспүүбүлүкэтин норуодунай худуоһунньуга Тимофей Андреевич Степанов төрөөбүтэ 80 сылыгар аналлаах, Олоҥхо декадатын чэрчитинэн ыытыллар “Олоҥхо хартыынатын тилиннэр” («Оживи картинку») аһаҕас күрэс сэтинньи 7 күнүттэн 25 күнүгэр диэри биллэриллибитэ. Күрэс соруга: олоҥхоҕо интэриэһи тардыы, кинигэни ааҕыыга угуйуу, айар дьоҕуру сайыннарыы. Күрэскэ барыта Сунтаар, Орто Халыма, Томпо, Кэбээйи улуустарыттан 42 үлэ киирдэ. Дьүүллүүр сүбэ быһаарытыынан бөлөҕүнэн үлэлэргэ 1-кы миэстэни Бордоҥтон Лукина Вилюяна, Данилов Дьулустан, 2-с миэстэни Тэҥкэттэн Тихонов Богдан, Тихонова Айвита, 3-с миэстэни Тэҥкэттэн Тихонов Арсен, Яковлев Эркин ыллылар, биирдиилээн үлэлэргэ 1-кы миэстэни Түбэйтэн Илларионова Вилена, 2-с Томпо Кириэс-Халдьаайытыттан Слепцова Сияна, 3-с Сунтаартан Винокуров Дима буоллулар. Кыайыылаахтаары ис сүрэхпититтэн эҕэрдэлиибит, бары кыттааччыларга махталбытын биллэрэбит. Сэтинньи 22–24 күннэригэр Сунтаардааҕы оҕо бибилэтиэкэтигэр Олоҥхо нэдиэлэтэ буолан ааста.
Сергей Афанасьевич Зверев – Кыыл Уолун аатынан Сунтаардааҕы норуот айымньытын киинигэр улуустааҕы “Сыахай“ олоҥхону куукуланан дьүһүйүү күрэһэ уонна “Оҕо уонна олоҥхо“ диэн улуустааҕы тэрээһиҥҥэ оҕо бибилэтиэкэтин үлэһиттэрэ кыттыыны ыллылар.
Бу тэрээһиҥҥэ “Олоҥхо эйгэтэ” кинигэ быыстапкатын, “Дьулуруйар Ньургун Боотур” куукула испэктээги туруордулар. Маны таһынан сүрүннүүр библиограф Светлана Иванова куукула быыстапкатыгар кыттан “Бастыҥ баайыы оҥоһук» анал ааты ылла. Тэрээһиҥҥэ кыра уонна улахан саастаах оҕолор олонхону норуот ырыаһыттара толорууларыгар истэн, куукула испиктээги, кинигэ быыстапкатын уонна олоҥхо дьоруойдарын араас ньыманан уус – уран оҥоһуктарын көрөн олоҥхо туһунан киэҥ өйдөбүллээх тарҕастылар.
Олоҥхо нэдиэлэтин чэрчитинэн «Березка», “Чебурашка” оҕо сайдар кииннэригэр, Сунтаардааҕы алын кылаас оскуолатын үөрэнээччилэригэр, Герасимов М.И. аатынан санаторнай оскуола — интэринээт үөрэнээччилэригэр “Олонхо дойдутугар айан” диэн тэрээһиннэр буолан аастылар.
Сүрүннүүр бибилэтиэкэр Марфа Спирова олоҥхо туһунан сүрүн өйдөбүлү кэпсээтэ. Манна олоҥхо үс дойдутун, сирин – уотун, дьоннорун – сэргэлэрин, хамсыыр харамайын туһунан кыра саастаах оҕолорго тиийимтиэтик билиһиннэрдэ. Бу кэннэ сүрүннүүр бибилэтиэкэр Римма Павлова уонна сүрүннүүр библиограф Светлана Иванова “Дьулуруйар Ньургун Боотур” диэн куукула испэктээги көрдөрдүлэр.
Бибилэтиэкэр Лия Тимофеева оҥорбут “Олоҥхо эйгэтэ“ кинигэ быыстапканы кэлбит ааҕааччылар уонна төрөппүттэр сэргээн көрдүлэр.
Портнягина А. П., Иванова С.Д.
