Сталинград куораты көмүскээһин 200 түүннээх күн устата салҕанан барбыта. 1942 с. от ыйын 17 күнүттэн саҕаламмыт улахан хаан тохтуулаах сэрии 1943 с. олунньу 2 күнүгэр Советскай армия кыайыытынан түмүктэммитэ. Бу күн Арассыыйаҕа бойобуой Албан аат күнүнэн биллэриллибитэ.
Бу бэлиэ күнү бэлиэтээн Сунтаар киин бибилэтиэкэтэ 1N-дээх орто оскуола 9в, политехническай лицей үрдүкү кылааһын үөрэнээччилэригэр «Сталинград — Албан аат куората» эр санаа уруогун ыытта. Оҕолор Сталинград кыргыһыытыгар кыайыы Аан дойду 2-с сэриитин хаамыытын тосту уларыппытын, Саха сириттэн, Сунтаар улууһуттан сэриилэспит буойуттар тустарынан билистилэр. «Сталинградская битва» документальнай видеоны көрдүлэр.
Тохсунньу 8 күнүгэр бэлиэтэнэр Эдэр антифашист-дьоруой кэриэстэбилин күнүн көрсө, уруокка оҕолор Сталинград эдэр көмүскээччилэрин хорсун быһыыларын кытары билистилэр. Мария Томская Аҕа дойду Улуу сэриитин сылларыгар Сталинград көмүскэлигэр турууласпыт оҕолор устуоруйаларын билиһиннэрдэ.
Бу кырдьык даҕаны, сэрии ыар кэмигэр тыһыынчанан оҕолор сэдэх хорсун уонна дьоруойдуу быһыыны көрдөрбүттэрэ. Кинилэр партизанскай этэрээттэргэ сэриилэспиттэрэ, разведчиктарынан уонна связнойынан үлэлээбиттэрэ, фроҥҥа уонна тыылга көмөлөспүттэрэ. Ол кыргыһыыларга элбэх эдэр дьон Улуу Кыайыы туһугар олохторун толук уурбуттара.
Аҕа көлүөнэ хорсун быһыыта умнуллубат!
Ааҕааччыны кытта үлэ салаа бибилэтиэкэрэ Раиса Павлова
