Кулун тутар 6 күнүгэр Сунтаар кииннэммит бибилэтиэкэтин ситимигэр умнуллубат суолу –ииҺи хаалларбыт, бар дьон убаастабылын ылбыт, үлэттэн дьолу билбит ССРС култууратын туйгуна, Сунтаар нэһилиэгин Ытык олохтооҕо Валентина Васильевна Иванова Дьаархан нэһилиэгэр төрөөбүтэ 80 сылыгар аналлаах «Сырдыгы, үйэлээҕи тарҕатааччы» истин-иьирэх ахтыы киэһэтэ буолла.
Бу киэһээ кыттыыны ыллылар Тойбохойтон Валентина Васильевна бииргэ төрөөбүт балта, СӨ атыытын-эргиэнини туйгуна Изабелла Васильевна, Дьокуускай куораттан РФ, СӨ доруобуйатын харыстабылын туйгуна Жанна Эдуардовна Егорова, Сунтаартан СӨ үөрэҕириитин туйгуна Екатерина Эдуардовна Иванова, Дьаархан нэһилиэгиттэн дьүөгэтэ Надежда Прокопьевна Седалищева уонна бибилэтиэкэ эйгэтигэр бииргэ алтыһан үлэлээбит кэллиэгэлэрэ, дьүөгэлэрэ.
Ахтыы киэһэҕээ Валентина Васильевна оҕо сааһын кэмнэриттэн саҕалаан, үөрэммит, үлэлээбит кэмнэрин билигин улэлии сылдьар кэллиэгэлэрэ ахтан-санаан аастылар. Валентина Васильевна киһи быһыытынан кэрэтин, муударайын, арыт дьээбэлээн да ылар түгэннэрин истиҥник санаатылар. Ахтыы киэһэни Дьокуускай куораттан Валентиналыын бииргэ таһаарыылаахтык үлэлээбит кэллиэгэлэрэ “Саха” НКИК эрэдээксийэтигэр үлэлиир, суруналыыс, СӨ суруйааччыларын сойууһун чилиэнэ, бэйиэт Ангелина Шадринова-Суоһааны, гуманитарнай чинчийии уонна хотугу аҕыйах ахсааннаах омуктар проблемаларын институтун научнай сотруднига, тыл билимин кандидата Егор Николаев ахтыылара киэргэттилэр. Бибилэтиэкэ үлэһиттэрэ кини урут туруорбут дьахтар сэттэ мэтириэтин оруолларынан үллэстэн толорон бэтэрээннэрбитин үөртүлэр, урукку көрдөөх кэмнэрин санаттылар. Бу күн истиҥ санаа иэйиилээх кэпсэтии, ырыа умнуллубат түгэнэ буолан ааста.
Валентина Васильевна үлэҕэ эппиэтинэстээх буолары, тустаах үлэни кэмигэр толорууну ирдиирэ, хаһан да мөҕөн-этэн кэбиспэт, киэҥ-холку, үтүө майгылаах этэ. Ытыктыыр салайааччыбыт, кэллиэгэбит Валентина Васильевна 40-тан тахса сыл бибилэтиэкэ эйэлээх кэлэктиибин кытта бииргэ үлэлээн ааспытын истиҥник саныыбыт. Кини улэлээн ааспыт ситиһиилээх-таһаарыылаах үлэтэ бибилэтиэкэ үлэһиттэригэр үтүө холобур буолар, кини үтүө аатын умнубаппыт.
Суруйда ааҕар салаа кылаабынай бибилэтиэкэрэ Мария Алексеева
