2025 сыл Арассыыйаҕа Аҕа дойдуну, Саха сиригэр ийэ дойдуну көмүскээччилэр сылларынан уонна Улуу Кыайыы 80 сылын көрсө Сунтаар улууһун дьоно-сэргэтэ, ахтар-саныыр норуот уос номоҕор, кэпсээҥҥэ сылдьар биһиги снайпербыт, кини аата дьоруойга тэҥнээх, кини аата ааттаныахтаах, Сунтаар улууһа дьоруойданыахтаах диэн элбэх дьон туруорсар, ыйыталаһар үтүө киһибит снайпер Егор Петров аатын умнумаҥ диэн, элбэхтик истэн, үйэ тухары ахтыллан кэллэ. Ол туоһутунан бүгүн «Егор Петров – снайпер-дивизия” диэн саҥа кинигэ сүрэхтэннэ.
Саҥа кинигэ, Дьокуускай куоракка Игнатьева Наталия Эдиссоновна чааһынай издательствотыгар бэчээттэнэн 300 ахсаанынан күн сирин көрдө. Кинигэни хомуйан оҥордулар СӨ үтүөлээх бырааһа, СӨ доруобуйа харыстабылын туйгуна, СӨ Роспотребнадзор бочуоттаах үлэһитэ, Үөһээ Бүлүү улууһун Бочуоттаах олохтооҕо, Үөһээ Бүлүү улууһугар доруобуйа харыстабылын Бочуоттаах үлэһитэ, Москва куорат «Сахаволонтер» общественнай добровольческай тэрилтэ волонтера, тоһоҕолоон этэр буоллахха анал байыаннай дьайыыга волонтердуур Полина Дмитриевна Розенблюм уонна Егор Константинович Петров сиэнэ, СӨ тыатын хаһаайыстыбатын туйгуна уонна бэтэрээнэ, «Норуот айымньытын сайдыытыгар кылаатын иһин” бэлиэ хаһаайката Антонина Степановна Кириллина.
Саҥа кинигэҕэ аҕа дойду сэриитин 1941-1945 сыллар усталарыгар Ленинграды, Волховской фроннарга дьоруойдуу сэриилэспит номох буолбут сержант Егор Константинович Петров бойобуой суолун туһунан РФ оборуона министерстватын архыыбын матырыйааллара бэчээккэ тахсыбыт суруйуулар ахтыылар киирдилэр. Холобур, иккис ударнай армия камандарма Романовскай уо.д.а биллэр полковниктар, Егор Константинович бойобуой доҕотторун, хаан-уруу аймахтарын, биир дойдулаахтарын ахтыыларыттан, кини саха киһитин быһыытынан сэмэйин, тулуурун, буойун быһыытынан хорсуна-хоодуота арылхайдык көстөр. Кинигэ биһиги аҕа көлүөнэ дьоммут аҕа дойду сэриитин кэмигэр бойобуой суолларын, хорсун быһыыларын, үйэтитиигэ көлүөнэттэн көлүөнэҕэ бэриллэн дойдуга бэриниилээх буолууга оруола улахан. Бу кинигэ уратыта хас биирдии сирэйгэ аллараа түһүмэхтэрин ааттара киирбитэ ситэрэн биэрэр. Егор Петров туһунан киинэлэртэн, хаартыскалартан, архыып докуомуннарыттан бүгүҥҥү кинигэ сүрэхтэниитигэр элбэҕи биллибит, иһиттибит.
Үөрүүлээх дьоро күҥҥэ бэйэлэрин эҕэрдэлэрин тириэртилэр Сунтаар улууһун бэтэрээннэрин сэбиэтин бэрэссэдээтэлэ Афанасий Васильев, Сунтаар улууһун аҕа баһылыга Анатолий Григорьев, Сунтаар улууһун депутаттарын сэбиэтин бэрэссэдээтэлэ Ульяна Попова, Сунтаар нэһилиэгин баһылыга Эдуард Филиппов, Сунтаар улууһун култууратын уонна айылгытын салалтатын салайааччыта Саргылана Омукова, Сунтаар улууһун тыатын хаһаайыстыбатын салайааччыта Владимир Анисимов, исписэлииһэ Маргарита Михайловна, В. Павлов аатынан Сунтаардааҕы алын сүһүөх оскуолатын директора Гаврил Еремеев. Маны сэргэ куйаар ситимин нөҥүө истиҥ эҕэрдэлэрин тириэртилэр СӨ култууратын уонна СӨ архыып дьыалатыгар туйгуннара Наталия Степанова. Улууспут историятын сырдатыыга элбэх кинигэҕэ үлэлэспит биир дойдулаахпыт Зинаида Игнатьева, РФ үөрэҕириитин туйгуна, СӨ үтүөлээх учуутала, учууталлар учууталлара Наталья Евдокимова, Усть Нера норуодунай театрын үлэһиттэрэ уонна продюсер, режиссер Дмитрий Шадрин – Шандор.
Дойдуларын дьонун ытыктаан, ыҥырыыларын ылынан, бэйэлэрин баҕа санааларын, эҕэрдэлэрин анаатылар Куокуну нэһилиэгин баһылыга Леонид Михалев, Бордоҥ баһылыга Константин Уаров уо.д.а.
Саҥа кинигэ сүрэхтэниитин киэргэттилэр Бордоҥ орто оскуолатын үөрэнээччилэрэ, В.Павлов аатынан Сунтаар маҥнайгы нүөмэрдээх оскуолатын 8 «в» кылааһын үөрэнээччилэрэ уонна библиотека волонтердара.
Түмүккэ Антонина Кириллина дьиэ кэргэнэ тэрийбит өлгөм астаах сандалы остуола тэрилиннэ. Ыҥырыылаах ыалдьыттар олус астынан, сэргэхсийэн тарҕастылар.
Бу саҥа кинигэ Улуу Кыайыы 80 сылыгар Сунтаарбыт улууһун дьонугар-сэргэтигэр бэртээхэй бэлэх буолла.
Суруйда Л.А.Попов аатынан Сунтаардааҕы киин бибилэтиэкэ
ааҕар саалатын кылаабынай бибилэтиэкэрэ Мария Алексеева
