«Сиэйэ оскуолатыттан — Ийэ дойду, сокуон көмүскэлигэр» диэн ааттаах Саха сирин полиция учаастактааҕы уполномоченнайдарын сулууспатын 100 сылыгар анаммыт саҥа кинигэ сүрэхтэннэ.
Ийэ дойдуну, төрөөбүт түөлбэни таптааһын, харыстааһын, көмүскээһин хас биирдии киһи ытык иэһэ буолар.
“Туох барыта оҕо саастан саҕаланар” — диэн өс хоһооно этэрин курдук, биһиги олохпут оскуола аанын аһан, үөрэнэр сыллартан биллэн барар. Ол курдук, баай, киэҥ төрдүлээх, устуоруйалаах Сиэйэ оскуолатыттан үөрэх ылан, үтүөкэн учууталларга үөрэнэн, киэҥ билиигэ умсаахтаан, бу оскуоланы бүтэрбит, үөрэммит оҕолор Ийэ дойду көмүскэлигэр, байыаннай идэни баһылаабыт уонна киһи быраабын, сокуону араҥаччылааччылар барыта 31 киһини сырдатар ураты суолталаах кинигэни СӨ үөрэҕириитин туйгуна, СӨ “Норуот айымньытын сайыннарыыга үтүөлэрин иһин”, Сунтаар улууһун “Сиэйэ нэһилиэгин сайдыытыгар үтүөлэрин иһин” бэлиэлэр хаһаайкалара, Сиэйэ нэһилиэгин кыраайы үөрэтэр “Утум” түмэлин төрүттээччи, Сиэйэ нэһилиэгин бочуоттаах олохтооҕо Октябрина Порокопьевна Булатова-Максимова хомуйан оҥордо.
Дьоро күн түһүлгэтигэр Сиэйэ нэһилиэгиттэн төрүттээх, ис дьыала уорганнарыгар , байыаннай дьыала араас эйгэтигэр үлэлээбит бэтэрээннэр, кинилэр чугас дьонноро кыттыыны ыллылар. Маны сэргэ Дьокуускай куораттан кинигэҕэ киирбит байыаннай дьыала араас эйгэтигэр үлэлээбит биир дойдулаахтарбыт видеонан эҕэрдэлэрин ыытан кинигэ сүрэхтэниитин киэргэттилэр. Саҥа кинигэ ис тутулун Л.А. Попов аатынан Сунтаардааҕы киин библиотека ааҕар саалатын библиограба Мария Иванова билиһиннэрдэ. Бэйэлэрин истиҥ эҕэрдэлэрин тириэртилэр: Сунтаар улууһун култууратын уонна айылгытын салалтатын салайааччыта Саргылана Омукова, Сунтаар улууһун аҕаларын түмсүүтүн чилиэнэ Константинов Тотонов, С.А.Зверев-Кыыл Уолун аатынан түмэл үлэһитэ Эмма Васильева, Сунтаар улууһун үөрэҕириитин түмэлин үлэһитэ Альбина Иванова, Сиэйэ нэһилиэгин баһылыгын солбуйааччыта Арсен Семенов, Сиэйэ кулуубун директора Мария Ефимова, Сунтаар технологическай колледжын салайааччыта Гаврил Михайлов уонна кинигэҕэ ахтыыларын биэрбит биирдиилээн дьон. Октябрина Прокопьевна хас биирдии ыалдьытыгар саҥа кинигэтин бэлэх уунан күндүлэлээтэ.
Октябрина Прокопьевна үүнэр көлүөнэҕэ анаан төрөөбүт нэһилиэгин историятын, дьонун-сэргэтин туһунан чахчыларга олоҕурбут архивнай дааннайдардаах элбэх кинигэни таһааран, Сиэйэ нэһилиэгин үйэтитиигэ кылаата улахан. Ол курдук,бу кинигэ 25-с кинигэтэ буоларын бэлиэтээх этиэххэ наада. Өссө да хас да кинигэҕэ үлэлэһэ сылдьарын таһынан, бүгүҥҥү көрсүһүүгэ хас да тэрилтэ кинигэҕэ наадыйалларын этэн аһардылар.
Ааптар этэринэн: «Мин билбиппин, ыччат билиэхтээх» — диэн патриотическай тыыны иитиигэ, төрөөбүт дойдуну таптыырга, дьоннорунан киэн туттарга ананан тахсыбыт кинигэ элбэх ааҕааччыланыа диэн эрэнэбит.
Октябрина Прокопьевнаҕа айымньылаах үлэтигэр өссө да үрдүк ситиһиилэри, саҥаттан саҥа үрдэллэри баҕарабыт.
Суруйда Л.А. Попов аатынан Сунтаардааҕы киин бибилэтиэкэ ааҕар саалатын кылаабынай библиотекрар Мария Алексеева
