Ахсынньы 4 күнүгэр аан бастакы алмаас көстүбүт, айар-тутар, үтүө үлэһит дьоннордоох Кириэстээх нэһилиэгэр саҥа тутуллубут “Саргы түһүлгэтэ” култуура киинин аһыллыытыгар аналлаах үөрүүлээх тэрээhин буолан ааста. Саҥа култуура дьиэтэ чулуу ыанньыксыт, Арассыыйа Үлэҕэ Дьоруойа Владимир Афанасьевич Михайлов дойдубут Бэрэсидьиэнигэр Владимир Путиҥҥа туруорсуутунан олоххо киирдэ. Сарсыарда 11 ч. саҥа кулуупка дьон бөҕөтө тоҕуоруһа мустан, үөрүүлээх кыһыл лиэнтэни кырыйыы церемонията буолла, эҕэрдэ эгэлгэтэ этилиннэ.
Күн иккис аҥарыгар бэлиэ түгэн саҥа култуура киинигэр олохсуйбут, саҥалыы тыыннаммыт, аныгы оҥоһуулаах бибилэтиэкэҕэ экскурсияттан саҕаланна. Олохтоох бибилэтиэкэ кылаабынай бибилэтиэкэрэ Людмила Афанасьевна кэлбит дьоҥҥо бибилэтиэкэни көрдөрдө, Кириэстээх нэһилиэгин историятын кэпсиир, олохтоох ааптардар айар үлэлэрин сырдатар кинигэ быыстапкаларын билиһиннэрдэ.
Салгыы бибилэтиэкэ иһинэн үлэлиир “Тымтык” түмсүү айар талааннаахтара Венера Петрова, Александр Амбросьев-Сайылык Уола, Марианна Васильева-Умтичаана, Лидия Данилова-Илгийэ саҥа тахсыбыт кинигэлэрэ сүрэхтэннилэр.
Салгыы “Күн тааһа – үйэ арыйыыта” диэн Кириэстээххэ Саха сирин бастакы алмааhын булбут Амака эспэдииссийэтин үлэтин уонна нэhилиэк устуоруйатын сырдатар түмэли тэрийбит, география учууталынан үлэлээбит, СӨ култууратын бочуоттаах үлэһитэ, норуот үөрэҕириитин туйгуна, Н. К. Крупская аатынан бириэмийэ лауреата Марфа Христофоровна Конобулова аатын үйэтитэр быыстапка-истиэндэ үөрүүлээх арыллыыта буолла. Истиэндэҕэ туруоруллубут экспонаттар тустарынан ыраах Новосибирскай куораттан анаан кэлбит, бииргэ төрөөбүт балта Клара Христофоровна кэлэн бэрт элбэҕи, интэриэһинэйи кэпсээтэ.
Эҕэрдэ тыллары эттилэр уонна санааларын үллэһиннилэр: «Сунтаар улууһа» МТ Баһылыга Анатолий Васильевич Григорьев, СӨ култуураҕа уонна духуобунай сайдыыга миниистирэ Афанасий Иванович Ноев, нэһилиэк баһылыга Александр Николаевич Григорьев, Сунтаар кииннэммит бибилэтиэкэлэрин ситимин методиһа Саргылана Федотовна Спиридонова уо.д.а. ыҥырыылаах ыалдьыттар.
А. И. Ноев улуустарга элбэх култуура кииннэрин аһыллыытыгар сылдьыбытын, уонна кулууп аһыллыытын үөрүүлээх күнүгэр бибилэтиэкэ тэрээһинигэр, олохтоох ааптардардыын көрсүһүүгэ аан бастакытын сылдьыбытын тоһоҕолоон бэлиэтээтэ.
Бу үөрүүлээх тэрээһиҥҥэ Үлэ Геройа В. А. Михайлов кэргэнинээн киирэн олорон таһымын үрдэттилэр. Маны таһынан, улууспут нэһилиэктэрин баһылыктара кэлэн ыалдьыттаатылар, саҥа библиотеканы сөҕө-махтайа, биһирии көрдүлэр, бибилэтиэкэҕэ сэмэй бэлэхтэрин кэмбиэргэ туттардылар.
Саргылана Спиридонова, Мария Иванова,
Леонид Попов аатынан Сунтаар киин библиотека специалистара
