Атырдьах ыйын 12 күнүгэр — Нахараҕа суолталаах күн буолан ааста.
Дьоллоох Дьокуускай куораттан Саха Өрөспүүбүлүкэтигэр үлэлиир «Историческая
память» федеральнай бырайыагы олоххо киллэрии чэрчитинэн, «Төрүт дойдум — сылаас тыына» тэрээһин буолан ааста. Ыалдьыттарбыт саха сиригэр биллэр-көстөр, туспа ааттаах-суоллаах дьоннор
«Историческая память» ФПП Саха сиринээҕи уопсастыбаннай Сүбэтин бэрэссэдээтэлэ, «Биир ньыгыл Арассыыйа» баартыйа Бэрэссэдээтэлэ Д.А. Медведев Саха сиринээҕи Уопсастыбаннай приемнайын салайааччытын солбуйааччыта Саргылаана Александровна Неустроева. Наахараттан төрүттээх
– «Историческая память» ФПП «Докумуон нэһилиэстибэтэ» хайысхатын салайааччыта, СӨ Национальнай архыыбын дириэктэрин солбуйааччыта Наталья Николаевна Малышева.
«Историческая память» ФПП «Өксөкүлээх Өлөксөй духуобунай нэһилиэстибэтэ» хайысхатын салайааччыта, А.Е.Кулаковскай-Өксөкүлээх Өлөксөй сиэнэ Лариса Реасовна Кулаковская. Ону тэҥэ Сунтаар улууһун баһылыгын социальнай уонна имиджевай бэлиитикэҕэ солбуйааччыта Гаврил Михайлович Еремеев, Сунтаар култууратын уонна айылгытын салалтатын салайааччыта Саргылана Дмитриевна Омукова уонна Сунтаар улууһун архыыбын салайааччыта Аркадий Егорович Яковлев буолан кэллилэр.
Ыалдьыттарбытын көрсүү сиэрин-туомун толорон кымыстаах, алаадьыннан айах тутан, түптэ буруотунан сытын унаарытан көрүстүбүт. Ол кэннэ Наталия Николаевна төрүт сириттэн Ыарҕа күөлүн түбэтиттэн, Дьөгүөрүмэ өтөҕүттэн сырыыбыт саҕаланна. Ол курдук Нахарабыт ытык сирдэриттэн Күөл Баһа, Микиисэ уус балаҕана, алгыс түһэр ыһыахтыыр сиргэ, хайаҕа тахсан сир хараҕын көрөн ыалдьыттарбыт олус сэҥээрдилэр, айылҕабыт кэрэтиттэн, дириҥ ис хоһоонноох дойдутун биллилэр-көрдүлэр. Ол кэннэ Наахарабыт нэһилиэгин олохтоохторун кытта көрсүһүүбүт кулуубка ирэ-хоро истиҥ дьикти алыптаах кэпсэтиһии буолла. Киһи сөҕүөх Мэҥэ-Хаҥалас Наахаратыттан уонна Амма Наахаратыттан эмискэ ыалдьыттар кэлэннэр тэрээһиммитин тупсардылар. Бүлүчээн нэһилиэгиттэн Наахараттан төрүттээх аймахтарбыт кэлэн тэрээһиммитин өссө киэргэттилэр. Барыта үөһэттэн ыйыллан турар дьиэбиттэрин курдук орун-оннугар табыллан элбэх кэпсэтиһии, инники үлэлэри былааннаатылар. Наахарам олохтоохторо Өксөкүлээх Өлөксөй сиэнэ Лариса Кулаковская илэ бэйэтинэн кэлэн төрүт Наахарабыт сиригэр-уотугар үктэммитэ хас биирдии олохтоохторго сүдү бэлэх буолар. Онон дьэ Наахарам дьоно-сэргэтэ, Наахараттан төрүттээх көрсүө-сэмэй дьоммут өрүү Түмсүөҕүҥ! Үүнүөҕүҥ! Сайдыаҕыҥ! Биһиги Наахаралар диир курдук үлэлиэҕиҥ!!!
Суруйда Саргылана Генерова
