Номох буолан, умнуллубат
Норуот тыыннаах тыла!
С. Зверев-Кыыл Уола
Олунньу 13 күнэ – талааннаах лингвист-ученай Семен Андреевич Новгородов төрөөбүт күнэ – төрөөбүт тыл, сурук-бичик күнэ.
С.А.Новгородов төрөөбүт тылын, литературатын, баай фольклорун анаан үөрэппитэ, чинчийбитэ, элбэх матырыйаалы, ыстатыйаны суруйбута. Олортон “Саха хантан хааннааҕа”, “Былыргы саха”, “Былыргы саха ууһаан-тэнийэн испитэ” ыстатыйаларга саха омук үөскээбит төрдүн ырытар-үөрэтэр. 1917 с. С.А. Новгородов латинскай алпаабыкка олоҕуран, сахалыы маассабай алфавиты оҥорбута уонна “Сахалыы сурук-бичик” диэн кинигэни таһаарбыта. Онтон кини салалтатынан “Бастааҥҥы сурук-бичик”, “Сурук-бичик”, “Ааҕар кинигэ” тахсыбыттара. Саха Республикатын правительствота 1924 с. Новгородов алпаабытын официальнай алпаабыт быһыытынан билиммитэ. Букварь уонна саҥа алпаабыт көмөтүнэн оскуолаҕа оҕолору төрөөбүт тылынан үөрэтэр кыах баар буолбута, сахалыы сурук-бичик түргэнник тарҕанан барбыта.
1996 с. олунньу 9 күнүгэр СР Президенин ыйааҕынан С.А. Новгородов төрөөбүт күнэ төрөөбүт тыл, сурук-бичик күнэ диэн олохтоммута. Төрөөбүт тылын билэр ыччаттаах эрэ норуот инникитэ кэскиллээх.