Саха сирин судаарыстыбаннаһын күнүгэр Сунтаардар Саха норуодунай суруйааччыта, поэтесса, суруналыыс, СӨ култууратын үтүөлээх үлэһитэ Наталья Михалёва-Сайаны кытары истиҥник, иһирэхтик көрсүстүлэр. Манна Сайа айымньыларын сүгүрүйээччилэрэ мустан ирэ-хоро кэпсэтэн, ыйытыктарыгар хоруй ылан дуоһуйа астыннылар. Наталия Владимировна-Сайа хоһоонноро олох уу сахалыы тыыннаах буолалларын, кэрэ ырыа буолан киэҥник тарҕанан дьон-сэргэ биһирэбилин ылалларын үллэһиннилэр. Маны сэргэ «Уйгур» сэһэни норуот сөбүлээн аахпытын Сайа өссө төгүл истэн, долгуйда уонна бу сэһэн суруллубут устуоруйатыттан сэгэтэн кэпсээтэ.
Бу курдук Саха сирин норуодунай поэта бэйэтин тус санаатын, кэпсээнин, хорутуулаах үлэлэри оҥорорун, айарын-тутарын сөҕө-махтайа иһиттибит.
Сайа ураты чаҕылхай айымньылары бар дьонугар бэлэхтиир, Саха сирин дьоһуннаах уопсастыбынньыга, патриота буолар.
Наталья Владимировна хоһооннорунан Владимир Николаев аатынан Сунтаардааҕы народнай театр туруоруутугар «Эн арыйдыҥ хоһоон кинигэтин» испэктээкил үрдүк таһымҥа ааспытынан истиҥник эҕэрдэлиибит. Бу одурууннаах орто дойду олоҕун уустук кэмигэр сырдык сулус буолан, бар дьоҥҥун үтүөҕэ, кэрэҕэ угуйа тур диэн баҕа санаабыт бастыҥын баҕара хаалабыт.
Ааҕааччыны кытта үлэлиир салаа
