Олунньу 12-14 күннэригэр Ийэ тыл, сурук-бичик күнүн чэрчитинэн Сунтаар улууһун бибилэтиэкэлэрэ 12-с төгүлүн ыытыллар өрөспүүбүлүкэтээҕи «Сахалыы дьыктаан» аахсыйаҕа кыттыыны ыллылар. Аахсыйа сыала уонна соруктара: сахалыы уус-уран тылы уонна саха тылын таба суруйуу быраабылаларын олоҕурдууну өйөөһүн, саха тылын суолтатын үрдэтии, саха тылын чөл хаалларарга уонна сайыннарарга туһаайыллыбыт тэрээһиннэри ыытыыга кыттыһыы, төрөөбүт норуокка патриотизм, таптал уонна убаастабыл санааларын, норуот төрүт үгэстэригэр, тылыгар харыстабыллаахтык сыһыаннаһыыны иитии.
Дьыктааны тэрийэн ыытыы уопсай салалтата ХИФУ саха тылын хаапыдыратыгар уонна СӨ Национальнай бибилэтиэкэтигэр сүктэрилиннэ.
Быйылгы кыттааччылар дьыктааны Дмитрий Сивцев–Суорун Омоллоон “Чүөчээски” айымньытыттан суруттардылар. СӨ култуура сыла биллэриллибитинэн дьыктааны улууспут бас-көс култууратын, үөрэҕириитин үлэһиттэрэ аахтылар. Сунтаар улууһугар барыта 22 былаһаакка тэрилиннэ, 294 киһи кыттыыны ылла. Саамай элбэх кыттааччы Л.А.Попов аатынан Сунтаар улууһун киин бибилэтиэкэтигэр 64 киһи, Бордоҥҥо 54 киһи, Тойбохойго 35 киһи бэйэлэрин тургутан көрдүлэр. Дьыктааны улуус үрдүнэн 24 киһи туйгуннук суруйан Добун сурук, кыттааччылар бары туоһу сурук тутан үөрдүлэр.
Тэрийээччилэр ааттарыттан төрөөбүт төрүт тылбытынан ааҕар, суруйар, сахалыы саҥаны, суругу-бичиги илдьэ сылдьар ааҕааччыларбытыгар улахан махталбытын тириэрдэбит!
Алена Портнягина,
методическай-информационнай салаа үлэһитэ
