Сунтаардааҕы кииннэммит бибилэтиэкэ ситимэ XI-с өрөспүүбүлүкэтээҕи «Сахалыы дьыктаан» аахсыйаҕа кыттыыны ылла.
Аахсыйа сыала: сахалыы уус-уран тылы уонна саха тылын таба суруйуу быраабылаларын олоҕурдууну өйөөһүн. Соруктара: саха тылын суолтатын үрдэтии, саха тылын чөл хаалларарга уонна сайыннарарга туһаайыллыбыт тэрээһиннэри ыытыыга кыттыһыы, сахалыы таба уонна сөпкө суруйуу үөрүйэхтэрин иҥэрии, ону тэҥэ сурук бэлиэлэрин уонна таба суруйуу быраабылаларын сурукка туһанар дьоҕурдары быһаарыы, төрөөбүт норуокка патриотизм, таптал уонна убаастабыл санааларын, норуот төрүт үгэстэригэр, тылыгар харыстабыллаахтык сыһыаннаһыыны иитии, СӨ олохтоохторугар суруйуу быраабылаларын билэллэрин уонна ону туһаналларын ситиһэргэ үлэни туһаайыы. Тылбыт кэрэхсэнэ, оҕолорбут, ыччаттарбыт төрөөбүт тылларынан саҥара-иҥэрэ сылдьалларыгар баар кыаҕы барытын туһанарга кыһаныахтаахпыт. Бу аахсыйа олортон биирдэстэрэ буоларын бэлиэтиибит.
Улуус үрдүнэн барыта 20 былаһаакка тэриллэн, 257 киһи бэйэтин тургутан көрдө. Быйылгы дьыктаан суруйааччы Тимофей Сметанин «Кыайбыттар ыһыахтара» айымньытыттан быһа тардыы буолла . Улуус үрдүнэн 32 киһи туйгуннук суруйда, кыттааччыларга барыларыгар туоһу сурук туттарылынна. Саамай элбэх кытааччы Тойбохойго-40 киһи, Сунтаарга-32, Хороҕо-20 бэлиэтэннэ. Тэрийээччилэр ааттарыттан бары кыттааччыларга улахан махталбытын тириэрдэбит.
Методическай-информационнай салаа
