Олунньу 13 күнүгэр Төрөөбүт тыл уонна сурук-бичик күнүгэр аналлаах сылын ахсын ыытыллар «Сахалыы дьыктаан -2025» аахсыйа Л.А.Попов аатынан Сунтаардааҕы киин бибилэтиэкэҕэ уонна Туойдаах нэһилиэгэр, олунньу 14 күнүгэр ыытылынна.
Быйылгы дьыктааны Улуу Кыайыы 80 сылын көрсө прозаик, драматург, поэт, Аҕа дойдуну көмүскүүр Улуу сэрии кыттыылааҕа, оҕо аймах тапталлаах суруйааччыта Тимофей Егорович Сметанин «Кыайбыттар ыһыахтара» диэн кэпсээниттэн быһа тардыыны суруйдулар. Сахалыы дьыктааны Л.А.Попов аатынан улуустааҕы киин бибилэтиэкэ библиография уонна краеведение салаатын сэбиэдиссэйэ Иванова М.Х. онтон Туойдаах нэһилиэгэр «Тускул» култуура киинин дириэктэрэ Ероскумова Т.А. суруйтарда. Уопсайа 32 кыттааччы билиитин тургутта. Ол курдук, дьыктаан түмүгүнэн:
«Бастыҥтан бастыҥ суруксут» аатын ылла Наталья Еремеева, Туойдаах нэһилиэгэр Людмила Иванова;
«Бастыҥ суруксут» аатын ылла Светлана Петрова, Туойдаах нэһилиэгэр Лариса Прокопьева;
«Үчүгэй суруксут» аатын үс киһи ылла Елена Иванова, Надежда Петрова, ыччакка Виолетта Потапова, Туойдаах нэһилиэгэр Ульяна Ераскумова.
Хас биирдии кыттааччыга Сахалыы дьыктааны суруйбуттарын бигэргэтэр тyohy сурук туттарылынна. Дьыктааҥҥа көхтөөхтүк кыттыбыт биир дойдулаахтарбытыгар тэрийээччилэр ааттарыттан махтанабыт, бу курдук сахалыы тыл сүмэтин иҥэрэн, өрө тутан инникитин да өрүү көхтөөхтүк кыттыахтара диэн эрэнэбит.
Суруйда ааҕааччыны кытта үлэлиир салаа сүрүннүүр бибилэтиэкэрэ Саргылана Генерова
