Ханнык да кинигэни арыйан киирэн бардахха, кини киһи курдук эйигин кытары кэпсэтэн, санаатын этэн, толкуйдатан барар үгэстээх. Киһи – кинигэ, кинигэ – киһи. Бу Сиргэ киһиттэн ордук сонун, дьикти суох эбээт. Киһи эппит санаатын, тугу этэ сатаабытын, эбэтэр кини тылын кэтэҕэр баары кыайан этиллибэтэҕи болҕойон, сыныйан биллэххинэ бэйэҕин эмиэ ордук билэн, арыйан барар курдук буолаҕын. Балаҕан ыйын 10 күнүгэр «Партизан» норуот айымньытын киинигэр поэзия кэхтибэт сибэккитэ, Сунтаар маҥнайгы поэтессата, Норуоттар икки ардыларынааҕы суруйааччылар сойуустарын чилиэнэ, СӨ култууратын туйгуна Саргылана Семеновна Спиридонова – Кэрэмэс Кийиитэ «Кэскиллээх кэриэспин хаалларыым…» диэн саҥа кинигэтин сүрэхтэниитин биһирэмэ төрүттэннэ.
Кинигэҕэ 2020-2024 сылларга суруйбут сорох хоһоонноро киирдилэр. Олох күһүнүгэр үктэнэн, кини суолтатын, туох аналлаах бу сиргэ кэлбитин ырытар, түмүктүүр санаалардаах хоһооннор үгүстэр. Кини баҕа санаата — бар дьоно дьоллоох буолалларыгар, кинилэргэ кэскиллээх кэриэс хаалларыы…Саҥа кинигэ, Дьокуускай куоракка Алгыс Арт бэчээт кыһатыгар, 100 ахсаанынан күн сирин көрдө, көмпүүтэргэ таҥна кыыһа Наталия Асамова. Кинигэ поэзияны сэргээччилэр киэҥ араҥатыгар ананар.
Киирии тылыгар Саха сирин норуотун суруйааччыта Наталья Михалева-Сайа уонна Арассыыйа Суруйааччыларын уонна Саха сирин Суруйааччыларын сойуустарын чилиэнэ Валентина Дьячковская-Хара Көмүс Саргылана чугас дьүөгэлэрэ олус иһирэхтик ахтыбыттара киирбит. Бу күн бэйэлэрин эҕэрдэлэрин Сунтаар улууһун аҕа баһылыга Анатолий Григорьев, Сунтаар улууһун култууратын уонна айылгытын салалтатын салайааччытын солбуйааччы Саргылана Конобулова, төрөөбүт дойдутуттан Маар Күөл нэһилиэгин олохтоохторо, Кэрэмэс Кийиитин чугас аймахтарын аатыттан Юрий О, бииргэ алтыспыт доҕоро Николай Егоров-Аҕырытта Ньукулай уонна айар-суруйар дьоҕурдаах биир идэлээхтэрэ «Ньургуһун» литературнай түмсүү чилиэттэрэ истиҥ тыллары эттилэр.
Саргылаана Спиридонова – сааһырыыны билиммэт сэмэй, хорсун сүрэхтээх, дьол кымыһын кыынньар чороонуттан амсайбыт, дьоллоох ийэ. Көччөх гынан көтүппүт айымньылара – хомоҕой тыллаах хоһоонноро тыыннахтарын тухары кэрэ далбар хотун Кэрэмэс Кийиитэ биһиги сүрэхпитигэр өрүү тыыннаах.
Суруйда Л.А.Попов аатынан киин бибилэтиэкэ ааҕааччыны
кытта үлэлиир салаа сүрүннүүр бибилэтиэкэрэ Саргылана Генерова
