Алтынньы ый 6-10 күннэригэр Новосибирск куоракка XXVI Бүтүн Арассыыйатааҕы научно-практическай семинар буолла. Арассыйатааҕы национальнай библиотека (РНБ), Арассыыйатааҕы библиотечнай холбоһук (РБА) уонна Новосибирскайдааҕы государственнай уобаластааҕы научнай библиотека тэрийдилэр, семинары иилээн-саҕалаан ыытта Арассыыйа национальнай библиотекатын библиография уонна краеведение салаатын научнай сотруднига Надежда Михайловна Балацкая.
Новосибирск куоракка, Кольцово наукоградка уонна Сузун куоракка буолбут семинарга 32 регионтан 99 специалистар (Контур-Толк куйаар ситимин нөҥүө 430 специалист), ол иһигэр Сунтаар кииннэммит библиотекаларын ситимин дириэктэрэ И. И. Жиркова салайааччылаах 4 специалист кыттыыны ыллыбыт. Сунтаардааҕы оҕо библиотекатыттан сэбиэдиссэй Никифорова М.И. уонна сүрүннүүр библиограф Иванова С.Д., Кэппэндээйи модельнай библиотекатын сүрүннүүр библиотекара Татьяна Ивановна Местникова «Окунись в науку» Кэппэндээйи эдэр кыраайы үөрэтээччилэр тустарынан стендэбэй көрүҥүнэн уонна Л.А. Попов аатынан Сунтаар киин библиотека ааҕар саалатын сэбиэдиссэйэ Елена Сергеевна Федорова «Ааҕар Сунтаар» дакылаатынан аан бастакы ыытыллыбыт Казариновскай ааҕыыларга кыттыыны ыллылар. Краеведческай семинарга кыттыбыт ураты дакылааттар «Проблемы краеведческой деятельности библиотек» диэн сылын ахсын тахсар кинигэҕэ киирэрин туһунан туоһулаатылар. Семинар уратыта диэн аһаҕас микрофоҥҥа семинар кыттааччылара хас дакылаат кэннэ араас этиилэри киллэрдилэр, проблемалары этиннилэр, ону быһаарар суолу тобулуу, сүбэлэһии буолла. Хас биирдии кэлбит кыттааччы Новосибрскайдааҕы областной библиотека фондатыгар 82 экземпляр кыраайы үөрэтиигэ аналлаах кинигэ бэлэх уунна. Кэлэр сылга XXVII краеведческай семинар Липецк куоракка буоларын билиһиннэрдилэр. Бэлиэтээн эттэххэ Сунтаар кииннэммит бибилэтиэкэлэрин ситимин специалистара хаһыс да сылын кыттаннар элбэх билиини ылаллар.
Елена Федорова, Сунтаар кииннэммит бибилэтиэкэлэрин ситимин дириэктэри солбуйааччыта
Мария Никифорова, Сунтаардааҕы оҕо библиотекатын сэбиэдиссэйэ
