Бүгүн, балаҕан ыйын 20 күнүгэр С.А. Зверев-Кыыл Уола аатынан норуот айымньытын киинигэр олоҥхону ойуулуур, оһуокайы олохтуур, ырыаны ыпсарар, хоһоону хоһуйар, эриэккэс сиэдэрэй айылҕалаах төрөөбүт-үөскээбит Сунтаарбыт улууһа үйэлэри уҥуордаан кэлбит өбүгэлэрбит үтүө үгэстэрин, сиэрбитин-туоммутун, ырыабытын-тойукпутун кэрэхсэллээх кэпсээннэрбитин, сэргэх сэһэннэрбитин, улууспут историятын уонна инникигэ эрэлбитин, төрөөбүт дойдубут сайдыытын кэрэһэлии турар, «Олоҥхо дойдутун оһуордаах кинигэлэрэ» — Сунтаар көмүс сериятын төрдүс тома сүрэхтэннэ.
Көмүс серия 2017 сыллаахтан тахсар, бу иннигэр сэттэлии кинигэнэн үстэ бэчээттэммитэ. Бырайыак төрдүс тахсыытын салайааччылара:
Анатолий Васильевич Григорьев — Сунтаар улууһун баһылыга,
Ульяна Дмитриевна Попова — Сунтаар улууһун депутаттарын сэбиэтин бэрэссэдээтэлэ,
Саргылана Дмитриевна Омукова — Сунтаар улууһун култууратын уонна айылгытын салалтатын салайааччыта,
эппиэттиир эрэдээктэр — Ольга Владимировна Захарова.
Көмүс серия «Сунтаар улууһа (оройуона)» муниципальнай оройуон үбүлээһининэн Дьокуускай куоракка “Дани Алмас” издательствоҕа бэчээттэнэн таҕыста. Быйылгы көмүс серия төрдүс таһаарыытыгар маннык кинигэлэр киирдилэр:
1. “Геройдар үрдүккэ көтөллөр” – хомуйан оҥордо Ольга Владимировна Захарова, Россия Суруналыыстарын союһун чилиэнэ, СӨ телевидение-радио туйгуна, Николай Кондаков аатынан бириэмийэ лауреата, элбэх кинигэни эрэдээктэрэ, маны сэргэ хас да кинигэ ааптара.
2. “Культурное наследие народного певца С.А. Зверева-Кыыл Уола: проблемы изучения, поиски (фольклористика, культурология, литературоведение)”. Хомуйан оҥордулар — Людмила Степановна Ефимова — филологическай билим доктора, Саргылана Валентиновна Никифорова — культурология билимин доцена уонна да атыттар.
3. “Эйиэхэ аныыбын кэс тылбын” кинигэни хомуйан оҥордо Захар Ильич Саввинов — СӨ культуратын туйгуна, СӨ культуратын үтүөлээх үлэһитэ, Сунтаар улууһун Элгээйи нэһилиэгин бочуоттаах олохтооҕо.
4. “Ийэ тыл кэрэһитэ Маппый Дьөгүөрэп”. Хомуйан оҥордулар — Варшавянка Матвеевна Егорова, Борис Матвеевич Егоров — СӨ үөрэҕириитин туйгуна, норуот үөрэҕириитин бочуоттаах бэтэрээнэ, Сунтаар улууһун норуотун маастара, Россия уонна Аан дойду худуоһунньуктарын сойууһун чилиэнэ.
5. “Сындыыс сулус кэриэтэ күлүм гынан ааспыта…” кинигэҕэ эдэригэр суох буолбут талааннаах суруйааччы Николай Түгүннүүрэп олоҕо, айымньылара киирдилэр. Хомуйан оҥордо — Надежда Константиновна Кузьмина — СӨ култууратын туйгуна, “Гражданскай килбиэн” бэлиэ наҕараадалаах, кыраайы үөрэтээччи, элбэх кинигэ тахсыытыгар үлэлэспитэ.
6. “Уран тыл умсулҕаннаах тойуксута. Норуот ырыаһыта, олоҥхоһут Алексей Петрович Амвросьев –Тойуктаах Өлөксөй”. Хомуйан оҥордулар — Евдокия Гаврильевна Сивцева — СӨ култууратын туйгуна, Александра Алексеевна Васильева — РФ доруобуйа харыстабылын, СӨ фармациятын туйгуна, А. Амвросьев кыыһа.
7. “Сунтаар улууһун баянистара”. Хомуйан оҥордо — Сергей Афанасьевич Семенов- Сэгэй, Сунтаар улууһун мелодистарын түмсүүтүн чилиэнэ, “Айар Кут” регионнааҕы кэпсээнньиттэр уонна хоһоонньуттар сойуустарын чилиэнэ, “За вклад в развитие народного художественного творчества РС (Я)” бэлиэ хаһаайына.
Тэрээһиҥҥэ Дьокуускай куораттан куйаар ситимин нөҥүө бэйэлэрин эҕэрдэлэрин тириэртилэр биир дойдулаахтарбыт — филологическай билим доктора Людмила Ефимова кэллиэгэлэринээн, РФ Геройа Филипп Евсеев, Сунтаар улууһун мелодистарын түмсүүтүн чилиэнэ Сергей Семенов-Сэгэй уонна бу көмүс серия бары тахсыытыгар үлэлээбит, Ольга Владимировна Захарова. Үтүө күн дьоро түһүлгэтигэр бэйэлэрин истиҥ эҕэрдэлэрин уонна баҕа санааларын эттилэр: Сунтаар улууһун аҕа баһылыга Анатолий Григорьев, Сунтаар улууһун култууратын уонна айылгытын салалтатын салайааччыта Саргылана Омукова, Л.А. Попов аатынан Сунтаардааҕы киин бибилэтиэкэ директоры солбуйааччыта Анатолий Львов уонна Дьокуускай куораттан ыҥырыылаах ыалдьыт Анетта Егорова, “Возрождения саха” кинигэ кыһатын директора, Сунтаар улууһун култууратын салалтатын информационнай, методическэй салаатын сэбиэдиссэйэ Галина Самойлова, Элгээйиттэн Уйбаан Нуолур аатынан модельнай бибилэтиэкэ кылаабынай бибилэтиэкэрэ Татьяна Семенова уонна Социалистическэй Үлэ дьоруойа Гаврил Андреев сиэнэ Александра Яковлева.
Эҕэрдэ ырыаларынан киэргэттилэр баянистар туһунан кинигэ дьоруойдара: Баҕатаан Саргын Арыылаах Уола, Тойбохойтон Клара Степановна Тихонова, Иван Иванов.
Сунтаарбыт аатын үрдэтэн, чинчийэр, айар үлэ үөһүгэр сылдьар ытыктабыллаах ааптардарбытыгар, кинигэлэри көрөн-истэн, сыаналаан таһаарар үлэһиттэргэ сүдү кылааккыт иһин барҕа махталбытын тириэрдэбит.
«Сунтаар – Олоңхо дойдута» көмүс серия кинигэлэрэ сахалыы санаалаах ааҕааччы, Сунтаар талааннаах дьонугар сүгүрүйээччилэр, кинилэр тустарынан сиһилии билиэн баҕалаах дьон болҕомтолорун тардыа, бэйэтин ааҕааччытын булуо диэн эрэнэбит.
Ааҕааччыны кытта үлэлиир салаа
