Атырдьах ыйын 12 күнүгэр Саха Өрөспүүбүлүкэтигэр үлэлиир «Историческая память» федеральнай бырайыагы олоххо киллэрии чэрчитинэн, «Өксөкүлээх Өлөксөйгө ананар биэс сыл» диэн көрсүһүү буолан ааста. Бу көрсүһүү Сунтаар улууһугар төрөөбүт төрүт тыл сылыгар буолбута уонна биһиги улууспутуттан саҕаламмыта улахан суолталаах буолла.
Дьокуускай куораттан «Историческая память» федеральнай бырайыак Саха сиринээҕи уопсастыбаннай Сүбэтин бэрэссэдээтэлэ, «Биир ньыгыл Арассыыйа» баартыйа Бэрэссэдээтэлэ Дмитрий Медведев Саха сиринээҕи Уопсастыбаннай приемнайын салайааччытын солбуйааччыта Неустроева Саргылаана Александровна, бырайыак «Докумуон нэһилиэстибэтэ» хайысхатын салайааччыта, СӨ Национальнай архыыбын дириэктэрин солбуйааччы Малышева Наталья Николаевна, бырайыак «Өксөкүлээх Өлөксөй духуобунай нэһилиэстибэтэ» хайысхатын салайааччыта, А.Е.Кулаковскай-Өксөкүлээх Өлөксөй сиэнэ Кулаковская Лариса Реасовна ыалдьыттаан аастылар.
Күн бүгүн Национальнай архыыпка хараллан сытар, 1912 сыл ыам ыйыгар Өксөкүлээх Өлөксөй «Саха интеллигенциятыгар» суругун копиятын Наталья Малышева аҕалан көрдөрдө. Маннык копия биһиги улууспут архивыгар эмиэ баарын истэн сэргээтибит. Улуу киһибит сыдьаана, билигин Сербияҕа олорор Лариса Реасовна Кулаковская тас дойдуларга олорор сахалары түмэр общественнай деятель. Кини эһэтин туһунан аҕата Реас Алексеевич ахтыытыттан кэпсээн иһитиннэрдэ. Саха сириттэн тэйиччи олордор да, элбэх атын региоҥҥа, кыраныысса да таһыгар олорор дьону кытта билсэн атын сиргэ бэйэтин дойдутун дьонун-сэргэтин, культуратын, традициятын, саха дьахтарын таҥаһын-симэҕин билиһиннэрэн омук сиригэр дойдутун ааттата сылдьар үтүө киһи эбит.
Саргылана Неустроева Өксөкүлээх 3 сиргэ туруорбут сэргэлэрин туһунан кылгастык гынан баран, бэрт сэргэхтик кэпсээтэ, саҥа бырайыактары өйүүллэрин эттэ.
Ол курдук, тэрийэн ыыппыт ыалдьыттарбытын, суруйааччы Өксөкүлээх Өлөксөй сиэнин кытта көрсөн, хаартыскаҕа түһэн кэлбит дьон дуоһуйан тарҕастыбыт.
Суруйда ИКТ отделын технолога Наталия Иванова
