Бүгүн, сэтинньи 24 күнүгэр, Сунтаар киин бибилэтиэкэтигэр саҥа кинигэ ааҕааччыга тиийэр биир дьоро күнэ буолан ааста.
РФ үөрэҕириитин туйгуна, Саха сирин үөрэҕириитин бочуоттаах бэтэрээнэ, Саха сирин социальнай-экономическай сайдыытыгар үрүҥ көмүс бэлиэ уонна «Курустаал глобус» профессиональнай бириис хаһаайкалара, Сунтаар сэлиэнньэтин бочуоттаах олохтооҕо Татьяна Федоровна Божедонова «Олохпут алгыстаах суолунан» диэн кэргэнин Алексей Васильевич Петрову кытта олорбут олохторун устуоруйатын кытта икки улуус (Сунтаар уонна Үөһээ Дьааҥы) олохторун-дьаһахтарын кэпсээнин холбоон таһаартарбыт бэрт астык таҥыылаах-оҥоһуулаах кинигэтин биһирэмэ буолла. Кинигэ сиэннэргэ, кэнэҕэски ыччаттарга дириҥ ис хоһоонноох бэлэх буолбутун ыҥырыылаах ыалдьыттар бары бэлиэтээтилэр.
6 түһүмэхтээх кинигэ түһүмэҕинэн үллэһиллэн, кэлбит эрэ ыалдьыт бары Петровтар-Божедоновтар хайдах-туох олохтоох-дьаһахтаах үлэлээх-хамнастаах, дьонноох-сэргэлээх ыал буолалларын кэпсээтилэр. Элбэх үтүө тыллар, ааспыт ахтылҕана,баҕа санаа бастыҥа этилиннилэр.
Кинигэ төһө да 70 эрэ устууканан таҕыстар, аймах-аймаҕынан түҥэтиллэн, кэлбит дьон бары тиксэн, үөрэн-көтөн, сыа-сым курдук тутан тарҕастылар.
Ааҕааччыны кытта үлэлиир салаа библиограба Мария Иванова
