Сунтаар – ытык алаһам,
Таптыыр сүрэх анала,
Дууһам иэйэр аргыһа,
Сырдык үөрүүм чаҕыла
Николай Чуор
Бэс ыйын 6 күнүгэр Сиэйэ нэһилиэгэр бэйиэт, суруналыыс Н. И. Харитонов-Николай Чуор төрөөбүтэ 90 сылыгар аналлаах «ЭРЭНЭ ОЛОХПУН АНЫЫБЫН» ырыа-хоһоон көҥүл түһүлгэтэ буолла. Дьокуускайтан саха норуотун суруйааччыта Н.В. Михалева-Сайа Саха НКИХ хамаандатынаан, ыаллыы сытар Ньурба улууһуттан «Ньурба уоттара» айар түмсүү кыттыылаахтара, Ньурба култууратын үлэһиттэрэ, Сунтаар нэһилиэктэриттэн элбэх дьон-сэргэ көхтөөх кыттыыны ылбыттара, бу тэрээһин интэриэһи тардыбытын туоһулуур. Тэрээһин үөрүүлээх аһыллыытыгар «Сунтаар улууһа (оройуона) муниципальнай тэриллии баһылыгын социальнай уонна имиджевай политика боппуруостарыгар бастакы солбуйааччыта Альберт Ионович Иванов Сиэйэ нэһилиэгэр олорон ааспыт, бар дьонугар үтүө өйдөбүлү хаалларбыт, Ньурба Куочайыттан төрүттээх суруйааччы Николай Чуор эрэллээх доҕоругар, кэргэнигэр эҕэрдэ, махтал тылларын этэн 100 тыһ. туттарда. Салгыы суруйааччыны ахтан-санаан аастылар, кэргэнигэр, оҕолоругар кинини үйэтитиигэ ыытар үлэлэригэр махтал тылларын анаатылар: Ньурба улууһун баһылыгын социальнай уонна имиджевай политика боппуруостарыгар бастакы солбуйааччыта Петрова Наталья Семёновна, Сунтаар улууһун култууратын уонна айылгытын сайдыытын салайааччыта Омукова Саргылана Дмитриевна, Ньурба улууһун култууратын департаменын салайааччыта Тихонова Розалия Михайловна.
Николай Чуор 85 сылыгар тутуллубут балаҕаҥҥа Сиэйэ сайаҕас олохтоохторо ыалдьыттары алгыстаах алаадьынан, саламаатынан, кымыһынан, күндүлээтилэр.
Тэрээһин биир сүрүн түгэнинэн суруйааччы олорбут дьиэтигэр төрөөбүтэ 90 сылыгар сөп түбэһиннэрэн мемориальнай өйдөбүнньүк арыллыытын долгуйа көрдүбүт, умнуллубат суолу хаалларда.
Үтүө киһи аата үйэлэргэ өлбөөдүйбэт! Бэйиэт, суруналыыс Н.И. Харитонов-Николай Чуор олорон ааспыт тэлгэһэтэ устуоруйа кэрэһитэ буолан үгүс айар суруйар талааннаахтары, дьону-сэргэни, ыччаты ыныра угуйа турдун!
Спиридонова С.Ф., Сунтаар киин бибилэтиэкэтин
методикаҕа-информацияҕа салаатын сэбиэдиссэйэ
