Аар айылҕа барахсан көмүс өҥүнэн дуйданан, сири-дойдуну көмүскэ суулаан, киэргэнэн аҕай турар кэмигэр ыаллыы сытар Ньурба куоратыгар, балаҕан ыйын 6 күнүгэр «Ньурба литературатын
олоҕун түстээбит үс үбүлүөйдээх суруйааччылар Степан Федотов, Ксенофонт Уткин-Нүһүлгэн, Николай Харитонов-Чуорга аналлаах «Ньурба көмүс күһүнэ» литературнай фестиваль үтүө-мааны тэрээһинигэр Сунтаар улууһун «Ньургуһун» литературнай түмсүү айар куттаах дьоно ыалдьыттаатылар. Тэрээһиҥҥэ Ньургуһун литераиурнай түмсүү салайааччыта Зинаида Васильева — Сыралы, түмсүү сүбэһитэ Валентина Дьячковская — Хара Көмүс, Розалия Сидорова — Ымыычаана, Зинаида Федотова — Дьол Кыыма, Екатерина Коротова — Кэтии Лэчил, Мария Данилова — Күн Мичээрэ, Любовь Понохова — Тумара уонна Л.А.Попов аатынан киин бибилэтиэкэ сүрүннүүр бибилэтиэкэрэ Саргылана Генерова кыттыыны ыллылар.
Дьон-сэргэ сүргэтэ өрө көтөҕүллэн, үөрэ-көтө муһунна, күн устата хоһоон киэҥ хонуута тардылынна. Бу күн «Ыллыыр норуот кэскиллээх» К.Д. Уткин — Нүһүлгэн хоһооннорунан литературнай-музыкальнай кэнсиэрти көрөн сэргээтибит. Ол кэннэ Ленин болуоссатыгар Автограф дьаарбаҥкатыгар Зинаида Васильева — Сыралы уонна Мария Данилова — Күн Мичээрэ кинигэлэрин атыылаатылар. Кэрэ көстүүлээх Бүлүү өрүс үрдүгэр араас тэрээһиннэр ыытылыннылар манна Ньургуһун литературнай түмсүү эҕэрдэ тылларын эттилэр уонна Николай Чуор хоһооннорун доргуччу аахтылар. «Чуор дууһалаах Чуор бэйиэт» Николай Чуорга аналлаах тэрээһиҥҥэ СӨ норуодунай суруйааччыта, биир дойдулаахпыт Наталья Михалёва-Сайа кыттыыны ылла. «Кэл. Олор. Сэһэргэһиэхэ.» бэстибээл ыалдыттарын — суруйааччылары, суруналыыстары кытта көрсүһүү уонна «Чуору дорҕоонноохтук ааҕыыга» чемпионат буолла. Маны таһынан эдэр блогердарга, суруналыыстарга маастар кылаастар, сүбэ-соргу биэрии түһүлгэтэ тэрилиннэ.
«Ньурба уоттарын » чилиэннэрэ, олохтоох автордар хайдах хоһоон хонуутугар киирбиттэрин кэпээтилэр. Ону сэргэ ааптардар бэйэлэрин хоһоонноруттан салҕыы суруйааһын сыанабылын биэрдилэр, Дьэргэстэй хоһоонноругар Кэтии Лэчил суруйан хайҕанна. Сарыада хоһоонноругар Дьол Кыыма уонна Сыралы тута хоһуйууларын сэргээбитин биллэрэн бэйэтин кинигэтин бэлэх уунна.
Бу курдук аҕыс буолан айар талааннаах дьоннор ахсым тимир көлө Игорь диэн эдэркээн суоппардаах баран кэллибит. Түгэнинэн туһанан улууспут дьаһалтатын аҕа баһылыгар Анатолий Васильевичка, култуурабыт салалтатын уонна айылгытын салайааччытыгар Саргылаана Дмитриевнаҕа биһигини өйөөн, тэрийэн ыыппыккытыгар махталбытын тиэрдэбит.
Поэзия киэҥ байҕалыгар умсуҥ, хоһоон хонуутунан хаамыҥ, этэҥҥэ сылдьыаҕыҥ, доруобай, дьоллоох буолуоҕуҥ!
Суруйда Л.А.Попов аатынан киин бибилэтиэкэ сүрүннүүр бибилэтиэкэрэ Саргылана Генерова
