Атырдьах ыйын 20 күнүгэр Уйбаан Нуолур аатынан Элгээйи модельнай бибилэтиэкэтигэр сахалыы тыллаах ааҕааччы кутун туппут айымньылардаах саха норуодунай суруйааччыта, драматург Дмитрий Наумов нэһилиэк олохтоохторун кытта көрүстэ, айар үлэтин, туох сыаллаах Элгээйигэ кэлбитин билиһиннэрдэ, олохтоох бибилэтиэкэҕэ кинигэлэрин бэлэх уунна. Талааннаах суруйааччы драматург быһыытынан сүрдээх айымньылаахтык үлэлиир, кини элбэх испэктээкиллэрэ саха театырын сыаналарыгар туруоруллан көрөөччү үрдүк сыанабылын ылаллар. Дмитрий Наумов бу күннэргэ «Элгээйи» собхуос бастакы директора Семен Максимович Журавлев туһунан испэктээкил суруйар былааннааҕын сырдатта. Испэктээккэ Семен Журавлев сырдык уобараһа чахчылаахтык уонна чаҕылхайдык сурулларыгар матырыйаал хомуйар. Эрэлэ-Элгээйи олохтоохторо уонна Семен Журавлевы киһи, сатабыллаах салайааччы, коммунист, Ленин уордьаннаах миллионер собхуос бастакы директорын, С.А.Зверев -Кыыл Уолун кытта билсиһиилэрин, дьиэ кэргэн аҕатын быһыытынан билэр бар дьон. Суруйааччы күһүн эмиэ Элгээйигэ кэлэн Журавлевы кытта алтыспыт, билсибит, көрбүт дьоннору сирэй көрсөн ирэ-хоро кэпсэтэр баҕалаах, онон Семен Максимовиһы билэр дьон, бука диэн, санааларгытын,ахтыыларгытын сааһылана сылдьаргытыгар көрдөһөбүт. «Элгээйи» собхуоһу аар саарга аатырдыбыт үтүөкэннээх салайааччы Семен Максимович Журавлев олоҕун бар дьоҥҥо билиһиннэрэр саҥа айымньыга бары көмө буолуоххайыҥ диэн ыҥырабыт.
Ону тэҥэ суруйааччы «30 кэпсээн», «Ааспыт үйэ оҕолоро, аныгы үйэ оҕонньотторо», «Кэпсиэхпин баҕарабын» кинигэлэрэ атыыга бааллар, биирдии кинигэ сыаната 500 солк.Билсэр нүөмэрдэргит:
89618679259 Чагдинская М.В.
89141144083 Семенова Т.А.
